Бэҕэһээ Чурапчы нэһилиэгэр улуус Аҕа баһылыга Андрей Ноговицын иккис болдьоҕор үлэлиир инаугурацията буолла. Бэлиэ түгэни нэһилиэк күнүн кытта дьүөрэлээтилэр.
Быйыл 370 сааһын бэлиэтиир Чурапчы нэһилиэгин күнүгэр улууска аҕа баһылыгынан иккис болдьоххо талыллыбыт Андрей Ноговицын инаугурацията буолла. Тэрээһин А.И. Федотов аатынан успуорт комплексыгар буолла.
Чурапчы күнүн бырааһынньыга П.Е. Барахсанов аатынан сынньалаҥ пааркатыгар ыытылынна. Араас таһымнаах атыы-эргиэн дьаарбаҥкатыгар оҕуруот, сир астарын, бэйэ оҥорон таһаарбыт бородууксуйатын атыылаатылар.
Тэрийээччилэр сылын аайы саҥаттан саҥа оонньуулары, күрэхтэһиилэри көҕүлүүллэр. Быйыл Чурапчы нэһилиэгин дьаһалтатын иһинэн рекорд олохтуур кинигэ оҥоһулунна, онно бастакы сайаапканы улуус бөдөҥ тутаах тэрилтэлэрэ биэрдилэр. “Чурапчы” ТХПК саамай уһун халбаһыны (устата 4м 32см, үрдүгэ 5см 8мм ) уонна “Маарыкчаан” ПО саамай улахан килиэби (иэнэ 4м 23см, уста мээрэйэ 1м 35см, үрдүгэ 23 см, ыйааһына 50 кг) оҥорон мустубут дьону күндүлээтилэр.
Эстрада сулустара кыттыылаах кэнсиэрт буолла уонна үгэс быһыытынан улуус бастыҥ асчыта Наталья Иванова оҥорбут туордунан дьону күндүлээтилэр.
Ааптар: Семен Жендринскэй
