Бэс ыйын 9-10 күннэригэр «Чолбон» сурунаал 90 сылынан, Уус Алдан улууһугар Тулунаҕа уонна Чараҥҥа уран тыл алыбар ылларбыт айар куттаах дьон түмсүүлэрэ сурунаал сүрүн эрэдээктэрэ Данил Макеев салалтатынан кэлбит кэлэктиибин уонна Саха Өрөспүүбүлүкэтин Суруйааччыларын сойууһун бэрэссэдээтэлин, норуодунай бэйиэти Иван Мигалкины, «Полярная звезда» сурунаал сүрүн эрэдээктэрэ Владислав Доллонову, «Саха сирэ» хаһыат «Саха ыала» сыһыарыытын эрэдээктэрэ Надежда Егорованы ыҥыран ыалдьыттата сырыттылар.
Ыҥырыылаах ыалдьыттары аан бастаан 11-с Лөгөй нэһилиэгин баһылыга Иннокентий Троев көрүстэ. Билиҥҥи уустук кэмҥэ сурунаал айар кэлэктиибэ уонна уран тыл маастардара бэйэлэрин айымньыларынан дьону үөрдэ сылдьалларын иһин махтанна.
Эбиэттэн киэһэ кулуупка Тулуна олохтоохторун уонна айар дьонун кытта атах тэпсэн олорон Саха АССР бастакы Конституциятын сүрүн ааптара, литэрэтиирэ биир бастакы кириитигэ Василий Леонтьев уустук олоҕун тула аһаҕас кэпсэтии буолла. Гаврил Андросов уонна Роман Бережнев Василий Никанорович айар үлэтин уонна төрдүн-ууһун туһунан сиһилии кэпсээтилэр. Салгыы суруйааччылар саха тылын, литэрэтиирэтин, сурунааллар, хаһыаттар билиҥҥи туруктарын уонна айар үлэ уустук ньымаларын кытта билиһиннэрдилэр, инники былааннарын туһунан кэпсээтилэр, ыйытыыларга хоруйдаатылар. Олохтоохтор Дьокуускайтан кэлбит ыалдьыттарга махтаннылар. Инникитин даҕаны маннык көрсүһүүлэри кэтэһэллэрин эттилэр уонна айар үлэлэригэр ситиһиини баҕардылар.
Иккис күнүгэр Чараҥҥа 1936 сыллаахха күһүҥҥү ыһыахха П.А. Ойуунускай тахса сылдьыбытын чиэстээн туруоруллубут пааматынньыкка үөрүүлээх түһүлгэни улуус култуураҕа сэбиэдиссэйэ Иннокентий Аммосов аста. Улахан суруйааччы, политическай деятель үйэлэр тухары умнуллуо суохтааҕар эрэнэрин эттэ. Ол кэнниттэн улуус айар куттаахтарын түмсүүлэрин чилиэннэрэ, «Чолбон» сурунаал делегацията пааматынньыкка гирлянда уонна сибэкки дьөрбөтө уурдулар.
В.А. Протодьяконов-Кулантай аатынан Литературнай музей комплексын дириэктэрэ Зоя Мигалкина «Чолбон» сурунаал «Сэмсэ» сыһыарыыта дьон болҕомтотун тардар айымньылары бэчээттээн эрэллэрин бэлиэтээтэ. Данил Макеев уонна Владислав Доллонов сурунаал сыһыарыытын ааҕааччылар сэргээн ааҕалларыттан үөрэллэрин биллэрдилэр. Анна Варламова-Айысхаана «Сэмсэҕэ» бэчээттэммит «Куорсун» айар түмсүү чилиэннэрин кэпсээннэрин, оттон Гаврил Андросов хоһооннорун ырыттылар, сүбэ-ама биэрдилэр. «Куорсун» айар бөлөх салайааччыта Марфа Соловьева айар дьоҥҥо «Сэмсэ» сыһыарыы олус наадалааҕын ыйда уонна «Чолбон» эрэдээксийэтигэр чорооннору бэлэх уунна. Бу тэрээһиҥҥэ улуус баһылыга Алексей Федотов кытынна. «Чолбон» сурунаал кэлэктиибин 90 сыллаах үбүлүөйдэринэн истиҥник эҕэрдэлээтэ уонна айымньылаах үлэни баҕарда.
