Таатта улууһун Амма нэһилиэгэр ытыллыбыт «Булчут кутаата-2016» күрэхтэһиигэ түөлбэлэртэн эр бэртэрэ күөн көрүстүлэр. Бу туһунан СИА «Айылгы» СК дириэктэрэ Марианна Решетникова иһитиннэрдэ:
“Күрэхтэһээччилэр сыал ытыытыгар, чэй оргутуутугар, балык хаптарыытыгар, күөлгэ тыынан устууга, булт саатын ыһан баран хомуйууга, эстафетаҕа күрэхтэстилэр. Саамай үөрүүлээҕэ, бириистэри олохтоох дьаһалтаны сэргэ кадровай уонна сөбүлээн бултуур дьон оҕолоро, сиэннэрэ дьоннорун-сэргэлэрин ааттарын үйэтитэр сыаллаах-соруктаах туруордулар. Бу күн кутааҕа сылаас чэйи оргутан, иҥэмтиэлээх минньигэс миини буһаран күрэхтэһии түһүлгэтигэр мустубут дьону барыларын күндүлээтилэр. Бэрт сэргэх тэрээһинтэн, бэл, тымныы курас күн сылыйарга дылы гынна», — диир кини.
Долгутуулаах тэрээһиҥҥэ Анна, Петр Никифоровтар аҕаларын Николай Аввакумов, бырааттарын Петр Аввакумов, Степан Соров абаҕата Михаил Соров, Татьяна Ефимова аҕата Егор Мамин, Данил Софронов аҕата Степан Софронов, Раиса Иванова аҕата Иван Беркин ааттарын ааттаан туран сертификаттары, бириистэри күрэхтэһээччилэргэ барыларыгар дохсун ытыс тыаһыгар доҕуһуоллатан туттарбыттара ураты истиҥ буолла. Дьон-сэргэ күрэхтэһииттэн улаханнык астынна, бириистэри туруорбут дойдулаахтарыгар, күрэхтэһиини тэрийбит нэһилиэк дьаһалтатыгар, «Айылгы» култуура-сынньалаҥ, «Дьулуур» спорт саала кэллэктииптэригэр махтаннылар.
This post was published on 10.05.2016 09:37 09:37