Ол курдук драматург, ол аата бириэмэни кытта олох араас көстүүлэрин, киһи кыһалҕатын өйгө-сүрэххэ тиийэр гына аттаран суруйар талаан сэдэх көстүү буоллаҕа. Онно холоотоххо Саха сирин аҕыйах ахсааннаах нэһилиэнньэтигэр билиҥҥи театрдары кытта үлэлэһэр биллэр суруйааччылар бааллара, пьесаны суруйуон баҕлаахтар кэнники син элбээбиттэрэ театр эйгэтин үлэһиттэрин үөрдэр. Ол иһин пьеса күрэһин ыытааччылар сүрүн болҕомтону аан бастатан туран күрэххэ төһө кыалларынан элбэх киһи кыттарыгар уураллар.
Быйылгы күрэс кыттыылаахтарын тохсунньу 26 күнүгэр, Култуура уонна духуобунай сайдыы миниистирин отчуоттуур көрсүһүүтүгэр чиэстээтилэр. Күрэскэ барыта 10 киһи кыттыбытыттан алтатыгар үп сертификаттаах номинация, уоннааҕы кыттааччыларга үс томнаах «Саха театрын антологията» туттарылынна.
Күрэс туһунан кылгастык билиһиннэрэр буоллахха, Театральнай деятеллэр союзтарын бэрэссэдээтэлэ Анатолий Николаев баһылыктаах дьүүллүүр сүбэ түмүгү таһаарбыта. Күрэскэ уон автортан 14 пьеса киирбитэ. Пьесалар тиэмэлэрин туһунан этэр буоллахха, бары тиэмэлэр билиҥҥи олоххо тутаах боппуруостары таарыйаллар. Онон тиэмэни булуу пьесаны суруйууга уустуктары үөскэппэт эбит диэххэ сөп. Ол курдук күрэскэ сэрии, таптал, айылҕа уонна киһи сыһыаннаһыыта, олоҥхо, Саха сирин чулуу дьоннорун туһунан, кырдьаҕас төрөппүттэргэ сыһыан, үтүө уонна хара дьай охсуһууларын мөккүөрэ, суорумньу тиэмэлэрэ бааллар. Балартан дьүүллүур сүбэ сэҥээриитин Дмитрий Наумов «Соргулаах суорумньу» комедията, Баһылай Харысхал «Победить или умереть!» диэн Саха сиригэр кэлбит бастакы быраастарга анаабыт пьесата, Валериан Николаев «Эйигин сөбүлүүр Лев Толстой» диэн саха бастакы бырааһа П.Сокольников туһунан пьесата, Иван Андросов-Айанньыт «Иэс» диэн пьесата, Айсен Дойду «Абааһылар мунньахтара» диэн олоҥхо тиэмэтинэн ыччака анаан суруйбут буффонадата, Иван Иннокентьев «Великий воскрешатель» диэн философскай пьесата ыллылар. Күрэс арыйбыт саҥа аатынан Иван Андросов-Айанньыт ааттанна. Кини «Иэс» диэн пьесатын дьүүллүүр сүбэ «Күрүлгэн» сурунаалга бэчээттииргэ мэктиэлээтэ.
Көстөрүн курдук биһирэммиттэр үксүлэрэ театры кытта ыкса үлэлэһэр драматурдар уонна суруйааччылар. Оттон инникитин өссө саҥа ааттары таһаарар сыалтан Театральнай деятеллэр союзтара суруйар баҕалаах дьоҥҥо семинардары тэрийэн ыытыахха сөп диэн быһаарыы ылынна. Күрэскэ киирбит пьесалар ТДС нөҥүө республика идэлээх уонна народнай театрдарыгар тарҕатыллыахтара.
