Бастыҥ Боотурга – МР-155 саа

0
78

Бу күннэргэ Сунтаар улууһугар, Устьеҕа, «Тещин Язык» диэн сиргэ улуус баһылыгын бирииһигэр Боотурдар күрэхтэһиилэрэ ыытылынна. Күрэскэ уопсайа 15 хамаанда күөн көрүстэ. Бу туһунан edersaas.ru таҕыста.


Сунтаар тэрилтэлэрин итиэннэ Тойбохой, Хадан, Наахара, Илимниир, Сиэйэ, Элгээйи, Бордоҥ, Устье, Маар Күөл, Түбэй Дьаархан нэһилиэктэрин хамаандаларын боотурдара бастыыр иһин илин-кэлин түһүстүлэр. Тэрээһини улуус дьаһалтатын ыччакка уонна спорка салаалара иилээн-саҕалаан ыыттылар.

Көрөөччүлэр киэҥ биһирэбиллэрин ылбыт күрэхтэһии туһунан улуус баһылыгын көмөлөһөөччүтэ Тимур Иванов маннык кэпсээтэ:

Күрэс биэс түһүмэҕинэн ыытылынна. Ол курдук, эстафета, гиирэ көтөҕүүтэ, балык былдьаһыыта, хомуур хапсаҕай, канаат тардыһыыта. Тыҥааһыннаах күрэхтэһии түмүгүнэн, Маар Күөл хамаандата эрэллээхтик бастаата. Иккис бочуоттаах миэстэни Сиэйэ, үһүс миэстэни Сунтаар сэлиэнньэтин колледжын хамаандата ыллылар. Былырыыҥҥы күрэс кыайыылааҕа, Сиэйэ бөҕөһө Ньургун Иванов муҥутуур чөмпүйүөн аатын ылан, МР-155 саа хаһаайынынан буолла.

Боотурдар күрэхтэһиилэрин улуус олохтоохторо эрэ буолбакка, ыаллыы сытар Ньурбаттан кэлбит  ыалдьыттар эмиэ улаханнык сэҥээрэн, маннык хабааннаах тэрээһини эр дьоҥҥо анаан регионнааҕы таһымнаах оҥоруохха сөбүн эппиттэр.

Маны тэҥэ, «Тещин Язык» сиргэ хайыһар баазатын дьиэтин арыллыытын сиэрэ-туома буолла. Манна Сунтаар улууһун баһылыга А.В.Григорьев, улуус баһылыгын бастакы солбуйааччы П.Н.Александров, бэтэрээн спортсменнар В.Г. Макарова, В.Н. Тотонов кыттыыны ыллылар.

0
0

Хоруй суох

Хоруйдаа