Норуоттар икки ардыларынааҕы илии көмөтүнэн кэпсэтии күнүн истибэттэр аан дойдутааҕы федерацияларын көҕүлээһининэн ХНТ Генеральнай Ассамблеята 2017 сыл ахсынньытыгар олохтообут. Федерация иһитиннэриитинэн аан дойдуга 70 мөлүйүөн истибэт киһи олорор. Кинилэр күннээҕи кыһалҕаларын илии көмөтүнэн эрэ быһаарсаллар. Аан дойдуга 300 кэриҥэ хамсанан этэр тыл арааһа баар, ону таһынан норуоттар ардыларынааҕы хамсаныы тыла.
Балаҕан ыйын 23 диэн Грегориан халандаарыгар сыл 266-с күнэ (ордук хонуктаах сылга 267-c күнэ). Сыл бүтүө 99 күн баар.
Бэлиэ күннэр:
- Оҕолор орто оскуоланы бүтэрбэттэрин утары охсуһуу күнэ
- Дойдулар ардыларынааҕы хамсанан этэр тыллар (язык жестов) күннэрэ
- Кыргыстаан — Судаарыстыбаннай тыл күнэ
- Литва — Геноцид эмсэҕэлээччилэрин кэриэстэбил күнэ
- Сауд Арабията — Национальнай күн
- Япония — Сюбун-но-хи диэн күн-түүн күһүҥҥү тэҥнэһиитин күнэ. Бу күн дьон өбүгэлэрин уонна өлбүттэри кэриэстииллэр.
Түбэлтэлэр:
- 1846 — Франция математига Леверье суоттааһынын туһанан ниэмэс астронома Галле Нептуну булбут.
- 1889 — Дьоппуоҥҥа Nintendo диэн видео оонньуу уонна оонньуур консоллары оҥорор хампаанньа төрүттэммит. Маҥнай кини хаарты оҥоруутунан дьарыктанар эбит.
- 1905 — Норвегия уонна Швеция Карлстад дуогабарын түһэрсэн эйэлээхтик арахсыспыттар. Норвегия бэйэтэ хоруоллаах тутулуга суох дойду буолбут, бу иннинэ биэс үйэ тухары Швеция эбэтэр Дания састаабыгар киирэр этэ.
- 1932 — Неджд султана Абдул-Азиз ибн Абдуррахман Аль Сауд судаарыстыбатыгар Хиджаз диэн эрэгийиэни холбоон Сауд Арабиятын төрүттээбит.
- 1997 — Яндекс поисковига үлэтин саҕалаабыт.
Төрөөбүттэр:
- 1901 — Ананий Андреев — 1929—1931 сс. Саха АССР Совнаркомун бэрэстээтэлэ, Саха АССР Коммунальнай хаһаайыстыбатын уонна энергетикэтин бастакы наркома. Сахалартан бастакынан инженер-теплоэнергетик дипломун ылбыта, ол кэннэ Дьокуускайдааҕы электростанция дириэктэрэ буолбута.
- 1937 — Нина Никифорова — Саха Өрөспүүбүлүкэтин Үтүөлээх учуутала, РСФСР норуотун үөрэҕириитин туйгуна, Учууталлар учууталлара, Үөһээ Бүлүү улууһун, Хоро нэһилиэгин ытык олохтооҕо.
- 1948 — Юрий Тарасов — социология билимин кандидата, политологияҕа уонна политическай социологияҕа идэтийбит Саха Өрөспүүбүлүкэтин норуотун хаһаайыстыбатын үтүөлээх үлэһитэ.
- 1959 — Ольга Корякина — Умсуура — бэйиэт, Арассыыйа Суруйааччыларын Сойууһун чилиэнэ, «Таатта» хаһыакка уонна «Чуораанчык» — «Колокольчик» сурунаалга радактор.
Өлбүттэр:
- 1939 — Зигмунд Фрейд — Австрия невролога, психоанализ туһунан үөрэҕи олохтообут киһи.
- 1981 — Георгий Васильев — литературовед, кириитик, тылбаасчыт, филология билимин хандьыдаата. 1938 сылтан ССРС Суруйааччыларын Сойууһун чилиэнэ.
