Бу күннэргэ Баку куоракка саха норуодунай бэйиэтэ Наталья Харлампьева «Доҕорум муус устар» диэн  кинигэтэ азербайджан тылынан тахсыбытыгар анаммыт презентация уонна суруйааччылыын көрсүһүүлэр буоллулар.

Наталья  Ивановна манна Ататюрк киинин ыҥырыытынан  кэллэ. Кинигэ тахсыытыгар, тылбааһын тэрийиигэ бэйиэт, издатель, уопсастыбаннай диэйэтэл, Түүр эдэр суруйааччыларын аан дойдутааҕы холбоһуктарын салайааччы Экбер Гошалы улахан оруоллаах. Кини Наталья Харлампьеваны Ататюрк киинэ тэрийэн ыытар Поэзия бырааһынньыгар бочуоттаах ыалдьыт быһыытынан ыҥырда.

Наталья Ивановна уонна Экбер Гошалы

Бу тэрээһиннэр — кинигэ тахсыыта уонна айан, Саха сиригэр олорор, үлэлиир Мохсоҕоллоохтооҕу цемент собуотун дириэктэрэ Алиш Мамедов спонсордааһынын көмөтүнэн олоххо киирдилэр.

Саха норуодунай бэйиэтэ Наталья Харлампьева ааҕааччыларын кытта көрсүһүүлэрэ Сумгаикка  лицейгэ, Култуура киинигэр, Бакуга педагогическай университекка ыытылыннылар.

Сүрүн презентация, биллэн турар, Ататюрк киинигэр Бакуга буолла. Манна литературовед, академик, Ататюрк киинин салайааччыта Низами Джафаров Наталья Харлампьева кинигэтигэр үрдүк сыанабылы биэрдэ. Кини этэринэн, Харлампьева поэзията түүр дьахталларын суруйууларын Олжас Сулейменов курдук  дьон таһымыгар таһаарар, дириҥ бөлүһүөктүү көрүүлээх, бэйэтин норуотун инникитин  ааспыт историятын кытта ситимниир, үрдэтэр, эрэллээх оҥорор ураты күүстээх.

— Биһиэхэ, маннык күүстээх лиичинэһи, кини айар үлэтин кытта билсэрбитигэр кыаҕы биэрбит Экбер Гошалыга махталбыт муҥура суох, — диэтэ Низами Джафаров.

Наталья Харлампьева маны таһынан, Бакуга, Былатыан  Ойуунускай “Кыһыл ойуунун” тылбааһын оҥорон бүтэрэн эрэр биллиилээх суруналыыс Аида Эйвазованы көрүстэ, консультация биэрдэ. Итиэннэ Бакуга Бастакы тюркологическай историческай сийиэс буолбут  дьиэтигэр сырытта.

Азербайджаҥҥа Ойуунускай айымньытын сэтинньигэ, суруйааччы төрөөбүтэ 125 сыллаах үбүлүөйүн көрсө, бэчээккэ таһаарар санаалаахтар.

Сүрүн хаартыскаҕа: Азербайджан Суруналыыстарын сойууһугар пресс-конференция буолла.

Татьяна МАРКОВА.

1
0
comments powered by HyperComments