«Азия оҕолоро» норуоттар икки ардыларынааҕы VI-с спортивнай Оонньуу кыайыылаахтара 50 тыһ.солк. кээмэйдээх бириэмийэни ылыахтара. Ити туһунан спорт миниистирин бастакы солбуйааччы Георгий Балакшин эттэ. Кини быһаарбытынан, хас мэтээл ахсын бириэмийэ бэриллэр. Маннык суумалаах наҕарааданы чөмпүйүөннэри иитэн-такайан таһаарбыт тренердэргэ эмиэ ананар. Үрүҥ көмүс мэтээл иһин 30 тыһ.солк., оттон боруонса иһин 20 тыһ.солк.
«Азия оҕолоро» норуоттар икки ардыларынааҕы VI-с спортивнай Оонньуу кыайыылаахтарын от ыйын 18 күнүгэр «Модун» спорт комплексыгар чиэстээбиттэрэ.
«Оонньуу үрдүк таһымнаахтык ааспытын өссө төгүл итэҕэйдибит. Күрэстэһии муҥутуур улахан этэ. Саха сирин сүүмэрдэммит хамаандата дьоһуннук кытынна. Кинилэр хас биирдиилэрэ кыайыы суолтатын дьэҥкэтик билэллэрэ, өйдүүллэрэ. Барыгытыгар барҕа махтал!» — диэн Саха сирин баһылыга Егор Борисов эдэр спортсменнары эҕэрдэлээтэ.
«Азия оҕолоро» норуоттар икки ардыларынааҕы VI-с спортивнай Оонньуу Дьокуускайга от ыйын 6 күнүттэн 16-гар диэри ыытыллыбыта. Күрэхтэһиигэ аан дойду 34 дойдутуттан, Россия 8 регионуттан барыта 2124 эдэр спортсмен кыттыбыта. Уопсайа 211 кэмпилиэк мэтээл спорт 22 көрүҥэр оонньоммута.
