«НАМИ» Арассыыйатааҕы наука киинэ хоту сир олохтоохторугар анаммыт вездеходу оҥорууга этии киллэрдэ.
Ити туһунан инженердэр съестэригэр «Арктика» бырайыак дириэктэрэ Марат Калимулин эттэ.
Дойдуга уонна омук сирдэригэр оҥоһуллубут вездеходтары Арассыыйа хоту регионнарыгар боруобалаан көрөр туһунан наука киинэ былааннааҕын кини эттэ. Ити түмүгэр тырааныспар күүстээх уонна мөлтөх өрүттэрэ дьэҥкэтик быһаарыллыахтарын сөп.
Марат Калимулин этэринэн, РФ Арктикатын социальнай-экономическай сайдыытын саҥардыллыбыт судаарыстыбаннай бырагырааматын чэрчитинэн оҥоһуллар. Көлүөһэлээх, гусеницалаах, уу аннынан сылдьар кыахтаах вездеходтары оҥоруу былааннанар. Ити барыта научнай чинчийиини аастаҕына уонна биир кэлимсэ ыстандаарты ылыннахтарына эрэ оҥоһуллар.
«Биһиги институппут кэккэ тэрээһиннэри ыыппыта, Саха сирин тэрилтэлэрин кытта улахан ситиһиилэннэ. Саха сирэ РФ арктическай түөлбэтигэр бөдөҥ регион буолар. Наукаҕа уонна оҥорон таһаарыыга улахан кыахтаах. Өрөспүүбүлүкэ сиригэр-уотугар чинчийиилэри ыытыы табыгастаах», — диир кини.
НАМИ киин Арктикаҕа анаммыт вездеход тиэхиньикэтин оҥоруу судаарыстыба бырагырааматыттан таһаарыллыан сөбүн туһунан этэллэр. «Онон биһиэхэ арктика регионнарын көмөтө наада», — диир Калимулин.
