Аммалар Сахаачча 70 сааһыгар өрөспүүбүлүкэ таһымнаах турнир ыыттылар. Үбүлүөйдээх тэрээһин кыттыылаахтара күрэстэһиини Сахааччаҕа анаммыт стендэ аһыллыытыттан уонна кини пааматынньыгар гирлянда ууруутуттан саҕалаатылар. Турнирга Кытай народнай өрөспүүбүлүкэтин бөҕөһө бириистээх миэстэни ылла.
Ахсынньы 20 күнүгэр аатырбыт бөҕөс, тустуу историятыгар аата көмүс буукубанан суруллубут Николай Захаров — Сахаачча баара буоллар 70 сааһын томточчу туолуохтаах этэ. Биир дойдулаахтара күндүтүк саныыр, этэҥҥэ сылдьыбыта буоллар, хайаатар да Олимп үрдүкү чыпчаалыгар тахсыахтаах уолларын үбүлүөйдээх сааһыгар кини тустубут үс ыйааһыныгар турнир ыыттылар.
Күрэхтэһии үөрүүлээх аһыллыытыгар кыттыыны улуус баһылыга Николай Архипов, «Олимпийскай эрэллэр» училищаларын директора Алексей Филиппов, Сахаачча быраата Иван Захаров уонна СӨ көҥүл тустууга Федерациятын толорооччу директора Николай Николаев ыллылар уонна Сахаачча пааматынньыгар гирлянда уурдулар.
Сахааччаҕа анаммыт «Улуу тустуук Сахаачча» стендэ аһыллыытыгар эҕэрдэ тылларын баһылыгы социальнай боппуруостарга солбуйааччы Иванна Шишигина, Сахаачча аатынан Амматааҕы оҕо спортивнай оскуолатын директора Ньургун Иванов уонна оскуола завуһа Виктория Владимирова эттилэр.
Турнирга 20 улуустан 34 бөҕөс кэлэн күөн көрүстүлэр. 62 киилэ ыйааһыҥҥа чөмпүйүөн аатын үрдүк маастарыстыба оскуолатын иитиллээччитэ, Тааттаттан Семен Владимиров ылла. Иккис миэстэҕэ Олимпийскай эрэллэр училищаларын устудьуона Георгий Кычкин таҕыста. Үһүс миэстэни училище устудьуоннара Айсен Винокуров (Эдьигээн) уонна Алексей Копылов (Өлүөхүмэ) ыллылар. 67 киилэҕэ Эдуард Григорьев (Чурапчы -Бүлүү) чөмпүйүөннээтэ. Иккис миэстэҕэ Айсен Потапов (Үөһээ Дьааҥы), үһүс миэстэҕэ Николай Иванов (Дьокуускай) уонна Айтал Захаров (Чурапчы-Томпо) таҕыстылар. 70-тан үөһээ ыйааһыҥҥа аан дойду кылаастаах маастар Герман Устинов (ХИФУ-Амма) бастаата. Кини кэнниттэн Ньургустаан Борщев (Бүлүү) буолла. Онтон бу ыйааһыҥҥа үһүс миэстэни Кытай народнай өрөспүүбүлүкэтин бэрэстэбиитэлэ Вей Пен Ю ылла.
Ааптар: Наталья Бубякина
