Амма улууһугар гражданскай сэрии бүтэһиктээх кыргыһыыта буолбут сирэ –Саһыл Сыһыы алаас. 2022 сылга диэри манна оччотооҕу кэми санатар чөлүгэр түһэрии үлэлэрэ ыытыллыахтара. 


Саха сиригэр эрэ буолбакка, Россияҕа кытта хаан тохтуулаах, бииргэ төрөөбүттэри, аҕаны уолун утары киирсиһиннэрбит  гражданскай сэрии бүтэһиктээх кыргыһыыта Амма сиригэр турбута диэн историктар бэлиэтииллэр. Абаҕа сиригэр өрүс уҥуор баар Саһыл Сыһыы алаас ааттанар.

2022 сылга Саха АССР тэриллибитэ 100 сылын туолар. Бу кэмҥэ Саһыл Сыһыыга гражданскай сэрии бүтэһик кыргыһыыта түмүктэммитэ эмиэ 100 сылын бэлиэтиэхпит. Бу икки даталар бэйэ бэйэлэрин кытта ыкса сибээстээхтэр. Үбүлүөйү көрсө Саһыл Сыһыыны ол кэминээҕитин курдук чөлүгэр түһэриэххэ диэн былааннаан үлэ ыытан, хамыыһыйа тахсан көрдө. Бырайыак эрдэ баара гынан баран, олус сыаналаах диэн, арыый уларытан оҥоруохтаахпыт. Саха сирин норуоттарын Спортивнай Оонньууларын иннилэринэ Ил Дархан Айсен Сергеевич Николаев тахса сылдьан Саһыл Сыһыы боппуруоһун көрөргө диэн анаан сорудах биэрэн турар. Бырайыак быһыытынан манна 1922 сыллаахха алаас хайдах этэй, онно ханнык тутуулар турбуттарын барытын чөлүгэр түһэрэн ол кэминээҕи хартыынаны оҥоруохтаахпыт уонна инникитин манна туристическай маршрут баар буолуо. Кэнэҕэски ыччаппыт ааспыт историяны билиэхтээх уонна ону харыстыахтаах“, — диэн этэр Абаҕа нэһилиэгин баһылыга Макар Тимофеев.

Икки сыл устатыгар ханнык-туох үлэлэр ыытыллыахтарын сөбүн көрө, сүбэлэһэ улуус баһылыга Николай Архипов салайааччылаах хамыыһыйа үлэлээтэ. Сирдьитинэн Саһыл Сыһыыга төрдүлэрэ олорбут Алексей Карманов сылдьан, барытын көрдөрөн, ханна туох турбутун кэпсээтэ.

Аммаҕа Саха сиригэр Гражданскай сэрии историятын кэпсиир түмэл баар.

Бу сырыы туһунан сиһилии „Амма олоҕор“ ааҕаарыҥ.

Ааптар: Наталья Бубякина, «Амма олоҕо» хаһыат, http://ulus.media/ сайт

1
0
comments powered by HyperComments