Аҕыйах хонуктааҕыта Амма улууһун баһылыга Николай Архипов баһылыгы тутууга солбуйааччы Дмитрий Ивановы уонна Физическэй култуура уонна успуор управлениетын начаалынньыга Эдуард Ефимовы кытта Нерюнгри оройуонугар сырыттылар. Айан сыала – бииргэ үлэлээһин туһунан кэккэ сөбүлэһиилэргэ илии баттааһын.
Амма оройуона Нерюнгри оройуонун кытта хас эмэ уонунан сыл сибээстэһэр. Бу сырыыга тыа хаһаайыстыбатын уонна бырамыысыланнай оройуон баһылыктара хардарыта барыстаах үлэ туһунан дьүүллэстилэр, сөбүлэһиигэ илии баттастылар. Аммалар ону сэргэ “Олохтоох каадырдары – бырамыысыланнаска” биэдэмистибэ бырайыагын чэрчитинэн бырамыысыланнас тэрилтэлэрин кытта эмиэ сөбүлэһии түһэристилэр, диэн Улус.медиа.ру иһитиннэрэр.
“Бу оройуону кытта уруккуттан доҕордоһобут. Биһиги улуус баһылыга Виктор Станиловскайдыын социальнай-экэнэмиичэскэй сайдыыга дуогабар түһэристибит. “Якутуголь”, “Колмар”, “ЭльгаУголь” бырамыысыланнай хампаанньалар салайааччыларын кытта аммалары үлэҕэ ылыы туһунан кэпсэттибит. Ону сэргэ Нерюнгрига биһиги спортсменнарбыт тиийэн эрчиллэллэрин туһунан кэпсэтии ыытылынна. Манна успуор кыһыҥҥы оонньууларыгар бэртээхэй усулуобуйалаахтар”, — диэтэ Амма улууһун баһылыгын тутууга солбуйааччы Дмитрий Иванов.
СИА.
