«Россия ийэлэрэ» Саха сиринээҕи салаатын Амма улууһунааҕы уопсастыбаннай хамсааһынын бэрэссэдээтэлэ Оксана Архипова: «Мин 2015 сыл балаҕан ыйыттан талыллан үлэлии сылдьабын. Биһиги уопсастыбаннай хамсааһыммытыгар номнуо 350 ийэ киирэн, улууспар, дойдубар, түөлбэбэр туһалааҕы, үйэлээҕи оҥордорбун диэн үлэлии -хамсыы сылдьабын», — диир.
Съезкэ саамай көхтөөх дьахталлар санааларын үллэстэ, уопуттарын кэпсии уонна атыттары истэ кэлэллэр. Талыллан кэлбит дьон буолалларынан, көрбүттэрин-истибиттэрин дойдуларыгар тиийэн олоххо киллэриэхтэрэ.
«Мин кэнники уон сылга доруобуйа уонна кэрэ эйгэтигэр үлэлиибин. Ол да иһин, бу бүгүн «Доруобай ийэ, доруобай оҕо» былаһааккаҕа делегат быһыытынан ыҥырыллан кэллим. Оҕо төһө доруобай, чэгиэн туруктанара ийэттэн улахан тутулуктаах. Ол аата ийэ доруобай буоллаҕына, дьиэ кэргэн эмиэ чэгиэн, бигэ туруктаах буолар. Биһиги улууспутугар хас да хайысханан: доруобуйа харыстабыла, култуура, эстетика, спорт уонна сиэр-туом үлэлээн эрэбит. «Эн доруобай өйдөөх-санаалаах буоллаххына – чэгиэн буолаҕын. Чэгиэн буоллаххына – доруобай өйдөөх-санаалаах буолаҕын» диэн санааны дьоммутугар-сэргэбитигэр тириэрдэбит», — диэн кэпсиир Оксана Архипова.
Амма көхтөөх дьахталлара саҥа дьыл иннинэ нэһилиэктэри кэрийэн, дьону-сэргэни кытта көрсүбүттэр. Онно Маргарита Лазарева диэн инбэлиит ийэни анаан-минээн илдьэ сылдьыбыттар. «Ыалдьыбыт дьон сиэр-туом, духуобунас өттүнэн сайдан, үтүөрэргэ барар. Ол иһин биһиги хас биирдии тэрээһиммитин кимиэхэ эрэ туһалаах буоллун диэн тэринэбит», — диир кини.
