Аммаҕа сүөһү аһылыгын бэлэмнээһин өрөспүүбүлүкэтээҕи бырагырааматынан алта тыраахтыр кэллэ. Хаһаайыттар саҥа тиэхиньикэлэрин Албан аат болуоссатыттан сүүрдэн бардылар.


Аммаҕа тыа хаһаайыстыбатын министиэристибэтэ, улуус, нэһилиэктэр дьаһалталара кыттыһан, өрөспүүбүлүкэтээҕи бырагыраамаҕа киирсэннэр, саҥа алта МТЗ -1221 тыраахтыр кэллэ. Кэнники үс сылга  улууска сүөһү аһылыгын бэлэмнээһин бырагырааматынан 133,5 биэрэстэ күрүө тутулунна, 6 ед. сиилэс угар траншея оҥоһулунна, 1315 гектар быраҕыллыбыт бааһыналары чөлүгэр түһэрдилэр, 45 тыа хаһаайыстыбатыгар аналлаах тиэхиньикэни, сэттэ МТЗ -1221 тыраахтары ылбыттара.

Үөрүүлээх чааска улуус баһылыга Николай Архипов, улууска тыа хаһаайыстыбатын салайааччыта Ион Кононов, Сэргэ Бэскэ ынах сүөһүнү иитиинэн дьарыктанар бааһынай хаһаайыстыба салайааччыта Константин Фомин,  Абаҕа нэһилиэгин баһылыга Макар Тимофеев эҕэрдэ тылларын эттилэр.

  

«Бу тыраахтырдар сүөһү аһылыгын бэлэмнээһиҥҥэ ананан кэллилэр. Кыттыгас бырагыраамаҕа киирсэммит биһиги былырыын 1 мөлүйүөнү угаммыт сенаһы бэлэмниир, бурдугу ыһарга аналлаах тэриллэри ылбыппыт. 95 бырыһыаннаах ороскуоту сабар бырагырааманан тыраахтыр ылан турабыт. Билигин 500 тыһыынча солкуобайы угаммыт 3 мөлүйүөннээх тыраахтырга тигистибит.  Онон быйыл Абаҕа хаһаайыстыбатыгар икки саҥа тыраахтыр баар буолла. Тыа хаһаайыстыбатын улууһа буоларбытынан маннык бырагыраамалар тыа сирэ сайдыытыгар улахан көмө буолаллар», — диэн Абаҕа нэһилиэгин баһылыга Макар Тимофеев үөрүүтүн үллэстэр.

Бөтүҥ хаһаайыстыбата (бэр. Дмитрий Левин), Сатаҕайтан Дьоруой Т.С.Лукин аатынан  хаһаайыстыба (бэр. Владимир Онуфриев), Соморсунтан «Үрүйэ» сылгы иитиитинэн дьарыктанар хаһаайыстыба (бэр. Семен Кононов), Чакыртан «Кэскил» сүөһү иитиитинэн дьарыктанар ХЭТ (дир. Александр Карманов), ), «Абаҕа» бурдук үүннэриитинэн дьарыктанар ХЭТ  (дир. Василий Тимофеев), Сэргэ Бэстэн хортуоппуйу үүннэриинэн дьарыктанар бааһынай хаһаайыстыба салайааччыта Александр Фомин  саҥа тыраахтырдары Албан аат болуоссатыттан сүүрдэн бардылар.

   

Ааптар: Алтана Артемьева, https://ulus.media

0
0
comments powered by HyperComments