Аҕам саастаах дьон бочуоттаах сынньалаҥҥа тахсан баран, бириэмэлэрин туһалаахтык атааралларын, уопсастыбаннай олоххо көхтөөх буолалларын туһугар өрөспүүбүлүкэ үрдүнэн «Үһүс көлүөнэ оскуолалара» аһыллыбыттара. Аммаҕа эмиэ бу хамсааһынтан туора турбакка, 2013 сыллаахха оскуола аһыллан үлэтин саҕалаабыта. Ол кэмҥэ баһылыгынан олорбут Александр Артемьев кырдьаҕастарга анаан саха балаҕанын туттаран, оскуола үөрэнээччилэрэ хайа баҕарар кэлэн дьарыктанар сирдэммиттэрэ.
Аммаҕа «Үһүс көлүөнэ оскуола» биэс сыллаах үбүлүөйүн бэлиэтээтилэр. Кинилэри үҥкүүгэ, ырыаҕа, иискэ, сахалыы оонньууларга, онтон да атын киһи дууһатыгар сытар дьарыктарга волонтердар үөрэтэн барбыттара.
Маннык оскуолалар баар буоланнар, аҕам саастаах дьон үлэттэн бүтэн баран, туоххаһыйан хаалбакка, уопсастыбаҕа тахсан, талаана арыллар. Кырдьа5астар туох баар тэрээһиннэргэ көхтөөхтүк кытталлар, биир да тэрээһиннэр кинилэрэ суох ыытыллыбаттар. Үбүлүөйдээх күн бастыҥ волонтердар, оскуола салайааччыта Наталья Дьячковская истиҥ эҕэрдэлэри туттулар. Улуус баһылыгын бастакы солбуйааччы Иннокентий Климентов волонтер Галина Афанасьеваҕа «Амма киэн туттуута» түөскэ анньыллар бэлиэни туттарда.
Бэйэлэрин эҕэрдэлэрин Амма нэһилиэгин баһылыгын социальнай боппуруостарга солбуйааччы Любовь Боярская, улуус бэтэрээннэрин Сэбиэтин бэрэссэдээтэлэ Александра Шестакова, социальнай көмүскэл управлениетын начаалынньыгын э.т. Саргылана Константинова, Дьокуускайтан, ыаллыы сытар Мэҥэ Хаҥалас улууһуттан кэлбит ыалдьыттар, тэрилтэ салайааччылара тириэртилэр, бастыҥнары бэлиээтилэр.
Кэлбит ыалдьыттар оскуола кыттыылаахтара уран тарбахтарынан оҥорбут уус уран оҥоһуктарын көрдүлэр. Дьоро чаас кэнниттэн кинилэр ыллыыр, үҥкүүлүүр талааннарын бар дьоҥҥо көрдөрдүлэр.
Ааптар: Наталья Бубякина
