«АЛРОСА» акцияларын приватизациялааһын кэмигэр судаарыстыба алмааһы хостооччу акциятын 18,9% атыылыан сөп. Ити туһунан экономическай сайдыы миниистирэ Алексей Улюкаев бэлиэтээтэ.
“Мин саныахпар, судаарыстыба өлүүтэ 18,9% аччыан сөп ”, –диэн Улюкаев этиитин “Финмаркет” тиэрдэр.
Российскай Федерация Росимуществонан сирэйдээн 43,9%, Саха сирэ 25% +1 акциялаах, ону приватизациялыыр туһунан боппуруос суох. Өссө акция 8% өрөспүүбүлүкэ муниципальнай оройуоннарын бас билиилэригэр баар. Ону былдьаан ылар Саха сирин сокуонунан көҥүллэммэт. “АЛРОСА” федеральнай бакыата муҥутаан 18,9% атыыланыан сөп. Онуоха РФ уонна өрөспүүбүлүкэ хонтуруоллааһыннара оннунан хаалар.
Минфин даннайдарынан, бырабыыталыстыбаҕа дьүүллэспиттэринэн, акция 10,9%, оттон 2017-2018 сылларга 8% атыыланыан сөп.
“АЛРОСА”-ны приватизациялааһын ыанар ынаҕы атыылааһыҥҥа тэҥнээх. Вице-премьер, РФ президенин Уһук Илиҥҥэ боломуочуйалаах бэрэстэбиитэлэ Юрий Трутнев маннык санааны этэн турардаах. Трутнев ыйарынан, судаарыстыба акциялары бас билээччи буоларын быһыытынан альтернативнай приватизация түмүгэр дивидент кээмэйин улаатыннарыан сөп. Кылгас кэм иһигэр атыы көрдөрүүтүн үрдэтэн үбү-харчыны үлэлээн булар кыахтаах. Ол эбэтэр кини сүтүк аҕыйах сылынан толуйуллуоҕун туһунан этэр.
