Саха Өрөспүүбүлүкэтин Судаарыстыбаннай Мунньаҕын (Ил Түмэн) бэрэссэдээтэлэ Александр Жирков атырдьах ыйын 27 күнүгэр АУо «Якутуголь» холдинговай тэрилтэ 50 сыллааҕы үбүлүөйүгэр анаммыт үөрүүлээх мунньахха кытынна.
«Якутуголь» тэрилтэҕэ араас сылларга үлэлээбит, хампаанньа уйугун буларыгар, салгыы сайдарыгар дьоһун кылааттарын киллэрбит бэтэрээннэр куруук ытыктабылга, чиэскэ-бочуокка сылдьыахтара. Саха сиригэр чоҕу хостооһун хайысхата хара саҕаланыытыгар турбут, бу салаа бигэтийэрин, сайдарын туһугар көлөһүнүн тохпут дьону биһиги өрөспүүбүлүкэбит мэлдьи өйүүр», — диэн Ил Түмэн спикерэ Александр Жирков «Якутуголь» тэрилтэ 50 сыллааҕы үбүлүөйүнэн уонна Шахтер күнүнэн эҕэрдэтигэр бэлиэтээн эттэ.
Өрөспүүбүлүкэ Соҕурууҥҥу өттүгэр чох хостооһун салаата тэтимнээхтик сайдыбыт кэрдиис кэмигэр тохтоон ылла, чох промышленноһын саҕаланыытыгар турбут ытык дьону ахтан-санаан ааста, итиэннэ ийэ дойду туһугар билигин өрө тахсыылаахтык үлэлии-хамсыы сылдьар дьону бэлиэтээтэ.
Маны таһынан Александр Николаевич атырдьах ыйын 24 күнүгэр биллиилээх судаарыстыбаннай уонна политическай деятель, Саха сирин 18 сыл устата салайбыт (1946-1965 сс.) Семен Борисов төрөөбүтэ 105 сыла туолбутун санатта. Семен Борисов кэскиллээх быһаарыылары хорсуннук ылыммытын, ити түмүгэр өрөспүүбүлүкэ инники сайдыытын түстүүр маҥнайгы дьоһун хардыылар оҥоһуллубуттарын туһунан эттэ. «Кини балысхан баайдаах Саха сирин соҕурууҥҥу өттүн биир кэлимсэ сайыннарар туһунан ССРС үрдүкү салалтатын таһымыгар аан бастаан туруорсубута, Советскай Сойуус бөдөҥ металлургическай кэмбинээттэрин кытта күрэстэһэр кыахтаах, дойду Хотугулуу-Илиҥҥи өттүгэр Чульман оройуонугар биир бөдөҥ холдины туттарар туһунан эппитэ. Маны таһынан, БАМ-ы тутууну салгыырга уонна Саха сиригэр тимир суолу тутарга этии киллэрбитэ. Ити кэскиллээх кини туруорсууларын Семен Борисовы өйөөччүлэр тиһэҕэр диэри тиэрдибиттэрэ, олоххо киллэрбиттэрэ», — диир Александр Жирков.
Түмүккэ Ил Түмэн спикерэ Саха Өрөспүүбүлүкэтин Судаарыстыбаннай Мунньаҕын (Ил Түмэн) Бочуотунай грамотатын Саха Өрөспүүбүлүкэтин социальнай экономическай сайдыытыгар өҥөтүн иһин «Якутуголь» АУо ХТ «Эльгауголь» ХЭТ экскаваторын машиниһыгар Сергей Климовка, «Якутуголь» АУо ХТ «Нерюнгринскай» хаһыы экскаваторын машиниһыгар Сергей Раздельщиковка, «Якутуголь» АУо ХТ дьаһайар дириэктэригэр Игорь Хафизовка туттарда. Итиэннэ Саха сиригэр чоҕу хостуур промышленность сайдыытыгар өҥөтүн уонна өр сыллаах кыһамньылаах үлэтин иһин Александр Жирков Саха Өрөспүүбүлүкэтин Судаарыстыбаннай Мунньаҕын (Ил Түмэн) Махтал суругун Саха Өрөспүүбүлүкэтин III уонна IV ыҥырыылаах норуот дьокутаатыгар, «Якутуголь» АУо холдинговай тэрилтэ 1998-2007 сс. генеральнай дириэктэринэн үлэлээбит Владимир Петровка үөрүүлээх быһыыга-майгыга туттарда.
Россия Президенэ Владимир Путин уонна премьер-министр Дмитрий Медведев ыыппыттар бэлиэ күнүнэн эҕэрдэ ыыппыттара. РФ энергиэтикэтин миниистирин Александр Новак аатыттан эҕэрдэлии Нерюнгрига кини солбуйааччыта Анатолий Яновский анаан кэлбит. Нерюнгри оройуонугар Шахтер күнүгэр анаммыт бары тэрээһиннэргэ Ил Дархан Егор Борисов кытынна. «Якутуголь» үбүлүөйүн бэлиэтиир үөрүүлээх мунньахха норуот депутаттара Виктор Федоров, Владимир Членов, Александр Кошуков бааллар.
