Кэлиҥҥи кэмҥэ Интернеккэ, Ватсапка быйыл сайын Дьааҥыга былааннаммыт Олоҥхо ыһыаҕа көспүтүн, букатын даҕаны ыытыллыбатын, өрөспүүбүлүкэ салалтата боппутун туһунан арааһынай сурах-садьык тарҕанар. Ол иһин улуус нэһилиэктэрин баһылыктара долгуйбуттарын биллэрэн, Ил Түмэн Бэрэссэдээтэлин аатыгар сурук ыыппыттар.
Бу боппуруоһу Саха Өрөспүүбүлүкэтин Государственнай Мунньаҕын (Ил Түмэн) Бэрэссэдээтэлэ, Олоҥхо иккис уон сылын өрөспүүбүлүкэҕэ тэрийэн ыытар Национальнай комитет бэрэссэдээтэлэ Александр Жирков маннык диэн быһаарда:
— Дьааҥы улууһугар былааннаммыт өрөспүүбүлүкэтээҕи Олоҥхо ыһыаҕа болдьоммут күннэригэр буолуоҕа. Ыһыаҕы Дьааҥыга ыытыы аҥардас биир улуус эрэ баҕа санаата буолбатах, бу өрөспүүбүлүкэ салалтата балачча толкуйдаан баран ылыммыт быһаарыыта. Бачча ыраах, суол-иис өттүнэн кыһалҕалаах уонна дьон-сэргэ бытанан олорор сиригэр үгүс ыалдьыттаах тэрээһини оҥорор судургу буолбатах. Ол үрдүнэн, улахан дьүүллэһии кэнниттэн, Олоҥхо национальнай комитета, “Олоҥхо” ассоциацията Дьааҥы улууһун дьаһалтатын, олохтоохторун хас да төгүллээх туруорсуутун учуоттаан, уһук хоту саха дьоно уутуйан олорор сирин талбыта ылбычча буолбатах. Бу эппиэтинэстээх быһаарыы дьааҥыларга ытыктабыл, эрэнии уонна итэҕэйии быһыытынан сүктэрилиннэ. Онон Дьааҥы ыһыаҕын дьон-сэргэ өргө диэри саныы сылдьарын, үтүө өйдөбүллээх буоларын курдук, быйылгы Олоҥхо ыһыаҕын хаһааҥҥытааҕар да үрдүк эппиэтинэстээхтик ыытар сорук турар.
Өрөспүүбүлүкэ салалтата ыһыах кэмигэр Дьокуускайтан Дьааҥыга көтөр авиарейстэргэ дотация көрөр былааннаах. Маны сэргэ Александр Жирков Дьааҥы улууһун бары нэһилиэктэриттэн ыһыахха кыттыан баҕалаах дьон Верхоянскайга кэлиитин-барыытын хааччыйар, социальнай рейстэри көрөр туһунан боппуруоһу туруорбута.
Түмүктээн эттэххэ, быйылгы Олоҥхо ыһыаҕа кырдьаҕас Верхоянскай куоратыгар былааннаммытын курдук бэс ыйын 28-29 күннэригэр ыытыллыаҕа. Күн-дьыл сылыйда да, ыһыах объектарын, Верхоянскайга Олоҥхо дьиэтин, Батаҕайга элбэх хайысхалаах култуура киинэ – Арчы дьиэтин тутуулара, тупсарыы үлэтэ саҕаланыахтара.
Бу туһунан Ил Түмэн пресс-сулууспата иһитиннэрэр.
