РФ Федеральнай Мунньаҕын Федерация Сэбиэтин чилиэнэ Александр Акимов Сунтаарга тиийэ сылдьан политехническай лицей тутуутугар бытаарыы тахсыбытын бэлиэтээтэ.
Александр Константинович тутуу докумуонун бу ыйга хайаан да оҥорон бүтэрэн, быйыл бастакы сыбаайа түһүөхтээҕин эттэ. «Эһиги баччааҥҥа диэри саатар сирин боппуруоһун быһаарбакка олороҕут. Тутуу бэдэрээччигэ биллэр, улууска үлэлээбит уопуттаах Андрей Данилов салайааччылаах «Сэттэ» ХЭТ буолар. Бу федеральнай тутуу, үбүлээһинэ чопчу быһаарыллан иһиэ», — диэтэ кини.
Лицей дьиэтэ Дьокуускай 24 №-дээх аатырбыт оскуолатын курдук моһуоннаах буолуохтаах. 500 миэстэлээх, 3 этээстээх.
Салгыы Маар Күөл оскуолатын тутуутун бырайыагар, Уһун Күөл оскуолатын тутуутугар тохтоото. «Билигин улахан тутуу барыта, буолаары буолан, оскуола аныгы ирдэбилинэн таас буолуохтаах. Оттон Уһун Күөл оскуолата баччааҥҥа диэри тутуллубата — сунтаардарга саат!» — диэн эттэ. Тойбохойдооҕу тутууну аҕыйах тылынан «Тойбохой култууратын киинэ хаһан тутуллан бүтэрэ биллибэт туруктаах» диэбититтэн сылыктаатахха, тутуу хаамыытыттан астымматаҕа тута биллэр.
Александр Константинович итинник кылгас бэлиэтээһиннэри этэн туран, уопсайынан улууска түргэнник тутуу матырыйаалын оҥорор баазаны тэрийэри сорук туруорда. «Улуус салалтата маны түргэнник олоххо киллэриэн наада. Уопсайынан улууска аныгы ирдэбилгэ толору эппиэттиир таас тутуу олус кэмчи», — диэн тоһоҕолоон бэлиэтээтэ.
Бу мунньахха кэпсэтиллибит боппуруостартан улуус инники сайдыытыгар биир улахан оруоллааҕынан, кэскиллээҕинэн Устьеҕа «Сунтаар» индустриальнай паарканы тутуу боппуруоһа эмиэ көтөҕүлүннэ. Александр Константинович этиини сэргиирин уонна инвестордары, туһааннаах федеральнай бырагыраамалары булан көмөлөһөрүн эттэ. Бу боппуруоһунан сибээстээн, Арҕааҥы уот ситимин тэрилтэтин салайааччыта Игорь Забегин Устьеҕа уот күүһүн өссө улаатыннарарга сөбүлэспитин эттэ.
