Бастакы киэҥ ыҥырыылаах пленарнай мунньаҕар Айсен Николаев толоруулаах былаас уорганнарын салайааччыларын болҕомтолорун уталытыллыбакка толоруллуохтаах соруктарга туһаайда.
“Элбэҕи үлэлиэхпит уонна түргэн тэтимнээхтик. Ону бүгүҥҥү балаһыанньа уонна дойду бэрэсидьиэнин ыам ыйдааҕы соруктарын толоруу ирдиир”, — диэтэ Айсен Николаев.
Өрөспүүбүлүкэ баһылыгын эбээһинэһин быстах кэмҥэ толорооччу, туох-ханнык иннинэ, халаантан эмсэҕэлээбит оройуоннар олохторун-дьаһахтарын чөлүгэр түһэриини уонна ойуур баһаардарын ураты хонтуруолга тутарга эттэ.
Судаарыстыбаннай бүддьүөтү толоруу ураты сорук быһыытынан этилиннэ. “Балаһыанньа уустук. Кэккэ түгэннэргэ хирург ньымаларын туһаныахпыт. Эмтиир кэми куоттарбыппыт”, — диэтэ Айсен Николаев.
“Сарбыйыы күүтүллэр. Бүддьүөт өрө тахсарын, таҥнары курулаабат туһугар балаһыанньаны суһаллык көннөрүөхтээхпит”, — диэн эбэн эттэ кини.
Салгыы дьаһалта уонна бырабыыталыстыба үлэтин көдьүүһүн туһунан этилиннэ.
Ол курдук, докумуон кумааҕынан эргиирин аччатыы, функциялары толорууну хатылааһыны суох оҥорорго этилиннэ. Дьаһалта уонна бырабыыталыстыба штатын ахсаанын 7 бырыһыан аччатарга этилиннэ.
Айсен Николаев ыам ыйынааҕы ыйаахха ыйыллыбыт 12 хайысхаҕа ситиһиилээхтик үлэлиир соруктаахпытын санатта.
Аркадий Васильев,
Андрей Сорокин хаартыската.
