Ньурбатааҕы оҕо научнай-техническэй өйүн сайыннарар киин 2016 с. саҕалаан Үөрэх министиэристибэтин тирэх киинин быһыытынан үлэлиир. Манна оҕолор 1-11 кылааска диэри дьарыктаналлар. 900 оҕоттон 375 үөрэнээччи техническэй айар үлэнэрэ дьарыктанар. Дириэктэри солбуйааччы Марфа Жендорусова бэлиэтииринэн, киин алта хайысханан оҕолору үөрэтэр. Ол курдук, техническэй, спортивнай-техническэй, художественнай-эстетическэй, социальнай-педагогическай, декоративнай-прикладной, естественнэй-научнай эйгэлэргэ уһуйар. Кииҥҥэ үөрэммит оҕолор өрөспүүбүлүкэтээҕи, федеральнай, аан дойдутааҕы куонкурустарга кыттан бириистээх миэстэлэри ылаттыыллар. Ол туһунан оҕолор бэйэлэрэ Айсен Николаевка кэпсээтилэр. Ону сэргэ, робототехникаҕа үөрэммиттэрин, араас бырайыактарын көрдөрдүлэр.
Айсен Николаев салгыы Кыталыктаах диэн Октябрьскай нэһилиэккэ тутулла турар саҥа микро-оройуону көрдө. Манна 2016 с. эдэр ыалларга дьиэлэр тутуллаллар. Былаан быһыытынан, барыта 100 дьиэ тутуллуохтаах. Күн бүгүн бу мантан 40 дьиэ үлэҕэ киирбит. Дьиэлэр уоттара-күөстэрэ, сылааска холбонуулара барыта сиппит.
Салгыы Ньурба куоракка тутуллуохтаах спортивнай киин, 3000 миэстэлээх стадион бырайыактарын билистэ. Ону таһынан улуус салалтатын кытары мунньах ыытта. Командировка түмүгүнэн, Ньурба улууһа кэнэҕэскитин Саха сирин арҕаа өттүгэр биир сайдыылаах киин буолуохтааҕын, онуоха инфраструктураны сайыннарыы барыахтааҕын бэлиэтээн эттэ.
Аграфена КУЗЬМИНА, “Саха сирэ” хаһыат.
