Кыргыстаантан киирсэр саха бөҕөһө Айаал Лазарев ааспыт өрөбүллэргэ Москубаҕа ыытыллыбыт норуоттар ыккардыларынааҕы Гран-при финалыгар Арассыыйа вице-чөмпүйүөнүгэр Шамиль Шариповка хотторон, иккис миэстэни ылла. Бу туһунан Спорт Якутии суруйар.
125 киилэҕэ диэри ыйааһыннаахтарга кыһыл көмүс мэтээл иһин киирсии тыҥааһыннаах буолла. Бастакы түһүмэх 1:2 ахсаанынан Дагестан бөҕөһүн туһугар түмүктэммит. Иккискэ Шарипов очукуотун икки төгүл эппитин, Айаал ситэн, түһүмэх 5:4 ахсаанынан түмүктэммит. Айаал «лампочка» уонна стойкаттан быраҕыы приемнарын таба туһаммыт. «Спорт Якутии» суруйарынан, бүтэһик албас иһин 4 балл бэриллэрэ хаалбыт. Күрэхтэһии бүтүө 20 сөк хаалтын кэннэ, утарылаһааччы Лазаревы тиэрэ бырахпыт. Инньэ гынан, кыһыл көмүһү Шарипов, үрүҥү Лазарев ылтар.
Айаал Лазарев уһун тохобул кэннэ үчүгэй дьарыктааҕын көрдөрбүт. Күрэхтэһии бастакы күнүгэр азербайдьан бөҕөһүн Ислам Абуевы 10:0 ахсаанынан хоппут.
