Кырдьаҕас дьон, биэнсийэлээхтэр, тыыл уонна үлэ бэтэрээннэрэ Хабаров аатынан уулусса 27/1 дьиэтигэр баар «Тэтим» ыччат киинин базатыгар компьютер кууруһугар босхо үөрэниэхтэрин сөп.
Дьокуускай куораттааҕы ыччат уонна дьиэ кэргэн бэлиитикэтин управлениета уонна «Үтүө санаа куората» уопсастыбаннай тэрилтэ тэрийэр бу куурустара 14.00-17.00 ч. ыытыллаллар.
– Кырдьыгынан эттэххэ, сэбиэскэй кэмҥэ улааппыт уонна уонна инники иһэр технологиялары билбэтэх-көрбөтөх дьон сотовай телефоннарынан, ноутбуктарынан үөрэ-көтө туһанарын уонна Интернеккэ наадалаах иһитиннэриилэри сатаан буларын көрөн олус соһуйдум. Кинилэр саҥаттан саҥаны билиэхтэрин баҕараллар итиэннэ социальнай ситим өҥөлөрүнэн туһанартан куттамматтар, – диэн «Үтүө санаа куората» уопсастыбаннай тэрилтэ доброволеһа Станислав Путрин санаатын үллэһиннэ.
Оттон кууруска сылдьааччылар: «Биһиги учууталларбыт бары эдэрдэр, тэтимнээхтэр, хас биирдии киһиэхэ болҕомтолоохтор. Ардыгар тута өйдөөбөтөхпүтүн да иһин, хаһан да кыыһырбаттар, сиһилии быһааран биэрэллэр. Билиибит таһыма барыбыт гиэнэ уратылаах. Тугу быһаарбыттарын барытын анал тэтэрээппитигэр сурунан иһэбит», – диэн этэллэр.
Үөрэтэр куурус алта дьарыктан турар. Холобур, Интернет ситимигэр наадалаах иһитиннэриини буларга, электроннай почтанан, мессенджер уонна социальнай ситимнэр нөҥүө сатаан кэпсэтэргэ, мультимедийнай дьарыктарга кырдьаҕастар ис сүрэхтэриттэн баҕаран туран үөрэнэллэр.
