Саха Өрөспүүбүлүкэтин бырабыыталыстыбатын көҕүлээһининэн РФ Госдумата электроэниэргийэни сүрүннүүр федеральнай сокуоҥҥа уларытыылары киллэрэр сокуон барылын бастакы ааҕыыга көрдө. Ити Арассыыйатааҕы орто тарыыпка Уһук Илин регионнарын гиэнин тэҥнээһин чааһыгар сыһыаннаах. Көҕүлээһин Госдума ырытыытыгар киириэр диэри элбэх сыралаах үлэ барбытын Ил Дархан эттэ.
«Ахсынньы 6 күнүгэр Уһук Илини сайыннарыы министиэристибэтин баһылыгын аатыттан миэхэ сурук кэлбитэ. Саха сиригэр элбэх локальнай дизель станциялара баалларынан, электроэниэргийэҕэ тарыып үрдүгүн туһунан боппуруоһу федеральнай киин таһымыгар өрөспүүбүлүкэ салалтата 2005 сылтан ыла көтөхпүтэ. Дойду баһылыга Владимир Путин маныаха сыһыаннаах бастакы сорудаҕа өссө 2009 сыллаахха бэриллибитэ.Ол кэнниттэн алта сыл былаһын тухары өрөспүүбүлүкэҕэ тарыып тоҕо үрдүгүн, регион бэйэтэ эрэ ити кыһалҕаны быһаарар кыаҕа суоҕун туһунан этэн, дакаастаан кэллибит. Элбэх үп-харчы тарыып араастаһыытын толуйууга эрэ буолбакка, дизельнай уматыктан тахсыыга ороскуоттанарын быһаарбыппыт. 200-тэн тахса суругу ыыппыппыт, федеральнай таһымҥа 30-ча мунньаҕы ыыппыппыт, сыл аайы перекрестнай субсидирование кээмэйин дакаастаабыппыт», — диир Егор Борисов.
«Баар барыйааны барытын үөрэтэн, ырытан баран тарыыбы тэҥнээһин өрөспүүбүлүкэ олохтоохторугар саамай сөптөөх эбит диэн түмүккэ кэлбиппит. Баҕарбыппыт хоту буоллаҕына, тарыып биллэ чэпчиэхтээх. Быһаарыы олоххо киирэригэр өрөспүүбүлүкэ уонна федеральнай бюджеттарга үп-харчы ороскуоттаммат. «Сахаэнерго» АО «Якутскэнерго» ПАО састаабыгар хаалар. Ити түмүгэр өрөспүүбүлүкэ олохтоохторун түөлбэлэргэ араартааһына суох биир кэлимсэ тарыып үөскэтиллэр», — кини.
Борисов РФ бырабыыталыстыбата сокуон барылын бүтэһиктээх ааҕыыга ылыннаҕына, тарыып чэпчиирин чиҥэтэн этэр.
Үрдүк күүрүүлээх эниэргийэ базовай тарыыба бигэргэннэҕинэ, бөдөҥ туһанааччылар «Якутскэнерго» ПАО электроэниэргийэтинэн туһанар буолуохтара. Оччоҕо атыыланар эниэргийэ кээмэйэ улаатар, оттон тарыып кыччыыр.
Базовай тарыыбы ылыннахтарына, намыһах күүрүүлээх эниэргийэни туһанар предпринимателлэргэ улахан чэпчэтии буолар.
«Үлэ өссө да түмүктэнэ илик. Федеральнай уорганнары кытта тарыыбы тэҥнээһини процеһын иҥэн-тоҥон быһаарыахтаахпыт. Ол эрээри үлэ аҥаара оҥоһулунна диэн бигэтик этиэххэ сөп. Уһуннук да буоллар, сыалбытын-сорукпутун ситиһиэхпит. Ити биллэн турар, бэйэҕэ эрэли үөскэтэр. Саха сирин туруулаһыытынан Уһук Илин региона барыта элбэҕи ситиһэр», — диир Егор Борисов.
