2022 сылга саха норуодунай суруйааччылара Семен уонна Софрон Даниловтар пааматынньыктарын Дьокуускай куоракка туруоруохтара. Бу туһунан СӨ баһылыгын уонна бырабыыталыстыбатын пресс-сулууспата иһитиннэрэр.
Бу боппуруоһу Со фрон Данилов төрөппүт кыыһа Вера Данилова өрөспүүбүлүкэ вице-премьера Ольга Балабкинаны кытта көрсүһүүтүн кэмигэр көтөхтө.
2015 сыллаахха СӨ култуураҕа уонна духуобунай сайдыыга министиэристибэтэ пааматынньык эскиһин оҥорууга куонкурус биллэрбитэ. Куонкурус түмүгүнэн архитектор Алексей Самсонов уонна скульптор Семен Прокопьев оҥорбут эскиистэрин бырайыага кыайыылааҕынан ааттаммыта.
Норуодунай суруйааччылар пааматынньыктара 2016 сыллаахха оҥоһуллубута. Ол эрээри боруонсанан кутуллубатах буолан сатаан туруоруллубатаҕа. Скульптура Дьокуускай куорат Ленин аатынан проспегын 36-с №-дээх дьиэтин аттыгар туруохтаах этэ.
«2022 сыл муус устар 19 күнүгэр өрөспүүбүлүкэҕэ саха норуодунай суруйааччыта Софрон Данилов 100 сааһын бэлиэтиир тэрээһиннэр ыытыллыахтара. Пааматынньыгы бу бэлиэ күн туруорар үчүгэй буолуо этэ», — диэн Вера Софронова эттэ.
Ольга Балабкина СӨ култуураҕа министиэристибэтигэр, бу боппуруоһу тус хонтуруолга ылалларыгар соруйда. Ону тэҥэ хас да сыл устата кураанах турбут постамент туругун чинчийии ирдэнэрин бэлиэтээтэ.
