2 мөл. тахса солк. бириистээх, дьон-сэргэ болҕомтотун үөһүгэр турбут ат сүүрдүүтүгэр улахан хатыһыылаах, эрийсиилээх күрэстэһии бэс ыйын 2 күнүгэр буолан ааста. Өрөспүүбүлүкэ бырабыыталыстыбатын бэрэссэдээтэлин бирииһигэр быйыл тохсус төгүлүн ыытыллар саха аттарын сүүрүүтүгэр 10 км уһуну 15 мүн 3 сөк.кэлбит Кустук муҥутуур кыайыылаах буолла.
Быйылгы ат сүүрдүүтүгэр ДьТХА, «Дерби», «СпидСтар» уонна өрөспүүбүлүкэ бырабыыталыстыбатын салайааччытын бириистэрин туруордулар.
«Дерби» бирииһигэр сүүрүүгэ үс саастаах 10 ат бэйэ-бэйэлэрин кытты күрэхтэстилэр.
«Сахалар ат сүүрдүүтүн олус сөбүлүүллэр. Дьон баһыйар үксэ ат төрдүн-ууһун, жокейын, тренерин иҥэн-тоҥон билэр. Хас сүүрдүү аайыы күүскэ ыалдьаллар, аттары олус таптыыллар», — диэн бырабыыталыстыба бэрэссэдээтэлин бастакы солбуйааччы э.т. – Саха сирин баһылыгын уонна бырабыыталыстыбатын дьаһалтатын салайааччыта Юрий Куприянов эттэ.
Сүүрүү хара саҕаланаатын кытта дьон өрө күүрдэ, өрүкүйдэ. ДьТХА бирииһигэр 800 м уһуну 51,9 сөк кэлбит Анна Арка (Мэҥэ Хаҥалас, «Плотников П.Р.» ИП) кыайыылаах үрдүк атын ылла.
Уопсайа 1 мөл.солк. бириистээх «Дербигэ» 2400 м 2 мүн. 48,9 сөк.кэлбит Флоренция Суола бастаата, иккискэ Крэк, үһүскэ – Синьорита, төрдүскэ — Толедо таҕыста. Бастаабыт акка 500 тыһ.солк., иккискэ — 250, үһүскэ – 150, төрдүскэ – 100 тыһ.солк. бириис быһыытынан биэрдилэр.
Саха сирин бырабыыталыстыбатын бэрэссэдээтэлин бирииһигэр уон саха ата сүүрдэ. Кустук, Барахсан, Астык эрийсиилээхтик күрэстэстилэр, түмүгэр Кустук кыайыы үөрүүтүн биллэ. Кини 10 км. уһуну 15 мүн. 3 сөк.кэллэ. Үрүҥ көмүс мэтээли киниттэн хаалбыт Барахсан ылла, Атаскаана үһүс миэстэны ылла. Кыайыылаахтар 1 мөл.солк. үллэһиннилэр.
Кыргыстаҥҥа быйыл балаҕан ыйыгар «Игры кочевников» бүтүн аан дойдутааҕы оонньуу буолар. Онно баҕар, Саха сириттэн аттар кытта тиийиэхтэрин туһунан бастакы вице-премьер – тыа хаһаайыстыбатын миниистирэ Петр Алексеев СИА-ҕа эттэ.
