2025 сылга «Земский работник культуры» федеральнайдааҕы бырагырааманан Саха сиригэр 11 оройуоннарыгар 11 квота көрүллүбүт. Бастакы кыттааччылар быйыл балаҕан ыйыттан үлэҕэ киирдилэр.
«Бырайыак олоххо киириитин бастакы сылыгар сүрүн сыал-сорук ыраах сытар нэһилиэнньэлээх пууннар оҕо искусствотын оскуолаларыгар педагогическай кадрдар тиийбэттэрин туоратыы буолар. Ол түмүгэр 11 фортепиано, хореография уонна музыка педагогтарыттан састаап үөскээтэ, регион 11 оройуонугар, ол иһигэр биэс Арктика улууһугарэ үлэлииллэр», — диэн өрөспүүбүлүкэ култуураҕа уонна духуобунай сайдыыга миниистирэ Афанасий Ноев бэлиэтээтэ.
«Земский работник культуры» бырагыраама Россияҕа 2025 сыл тохсунньу 1 күнүттэн дойду президенэ Владимир Путин сорудаҕынан саҕаламмыта. Бырайыак «Культура сайдыыта» судаарыстыбаннай бырагыраама чэрчитинэн олоххо киирэр уонна «Дьиэ кэргэн» национальнай бырайыак сыалын-соругун толорор.
Кыттааччыларга 2 мөл.солк. суумалаах биир кэмнээх төлөбүр көрүллэр, ону ыларга биир усулуобуйанан талбыт үлэ миэстэтигэр биэс сылтан итэҕэһэ суох үлэлиир эбээһинэс буолар.
«Земскэй культура үлэһитэ» бырагыраама култуура үлэһиттэрин профессиональнай уонна социальнай көҕүлээһиннэрин олоххо киллэриигэ усулуобуйаны тэрийиигэ, ону тэҥэ тыа сиригэр уонна кыра куораттарга култуура тэрилтэлэригэр кадр кыһалҕаларын быһаарыыга туһуланар.
Источник: sakha.gov.ru
