Олунньу 23т күнүгэр «Зарница 2.0» бүтүн Россиятааҕы байыаннай-патриотическай оонньуу официальнай саайтыгар сүүмэрдиир түһүмэххэ кыттарга сайаапка ылыныы саҕаланна. Бу туһунан ЯСИА-ҕа бырайыак тэрийээччилэрэ иһитиннэрдилэр.
Оонньуу «Ыччат уонна оҕо» национальнай бырайыак чэрчитинэн олоххо киирэр. Тэрийээччилэринэн «Бастакылар хамсааһыннара», «ЮНАРМИЯ» ВВПОД уонна «ВОИН» киин үлэлииллэр.
Бырайыак сыала — ыччат личноһын бары өттүнэн сайыннарыы: интеллектуальнай, сиэр-майгы уонна эт-хаан өттүнэн тупсарыы, алын сүөһүх байыаннай бэлэмнэнии үөрүйэхтэрин үөскэтии, ону тэҥэ Аҕа дойдуну көмүскүүр гражданскай иэһи уонна конституционнай эбээһинэһи толорууга бэлэм буолуу.
Саха сиригэр бырайыак үрдүк таһымнаах кыттыыны көрдөрөр. 2025 сыллаахха дойду үрдүнэн 3,1 мөлүйүөнтэн тахса сайаапка бэриллибитэ. Өрөспүүбүлүкэтээҕи оонньууга 27 тыһыынчаттан тахса киһи кытынна — күрэхтэһии сааһынан түөрт категорияҕа араарыллан, бары муниципальнай оройуоннарга ыытылынна.
«Зарница 2.0» кыттыылаахтара пилота суох көтөр аппарааттары салайыыга, бастакы көмөнү оҥорууга, дезинформацияҕа уонна киберкутталы утарар практическай үөрүйэхтэрин ылаллар. Бырагыраама эмиэ тактическай бэлэмнэнии элэмиэннэрин, тыыннаах хаалар төрүтүн уонна хамаанданан үлэлээһини киллэрэр.
Ону таһынан оонньуу дьиссипилиинэни, эппиэтинэһи, хамаандаҕа үлэлиир дьоҕуру сайыннарар. Кыттыы ыччат тэрээһиннээх, бэйэтигэр эрэллээх буоларыгар көмөлөһөр.
This post was published on 24.02.2026 18:06 18:06