Үбүлүөйдээх Илиҥҥи экономическай форумҥа кыттыыны 36 дойду уонна территория бэрэстэбиитэллэрэ бигэргэттилэр. Форум 6 тыһыынча кэриҥэ кыттааччыны мунньара күүтүллэр. Бу туһунан Российскай Федерация бырабыыталыстыбатын бэрэссэдээтэлин солбуйааччы — РФ президенин Уһук Илиннээҕи федеральнай уокурукка боломуочуйалаах бэрэстэбиитэлэ, ВЭФ тэрийэр кэмитиэтин бэрэссэдээтэлэ Юрий Трутнев сүбэ мунньаҕар этилиннэ.
«Үбүлүөйдээх Илиҥҥи экономическай форумҥа бэлэмнэниини салгыыбыт. ВЭФ Уһук Илин сайдыытыгар күүстээх импульс биэрэр: регионҥа инвестиция кэлэр, аныгы тэрилтэлэр уонна аэропорттар тутуллаллар, үлэ миэстэтэ тэриллэр. Манна сүрүн көҕүлээһиннэр — инникилээн сайдар территориялар, «Уһук Илиҥҥи гектар» бырагыраамалар, чэпчэтиилээх ипотека, куораттары сайыннарыы маастар-былааннара үлэҕэ киирдилэр. Дьон-сэргэ дьиҥнээх уларыйыыны билэр. Улахан суолталаах: Уһук Илин бүгүн Россия уонна Азия-Тиихэй акыйаан регионун дойдуларын икки ардыларыгар транзитнай территория быһыытынан стратегическай оруолу ылар», — диэн бэлиэтээтэ Юрий Трутнев.
Үгэс курдук киин событиенан «Уһук Илин Уулуссата» быыстапка буолуоҕа, онно федеральнай уокурук бары 11 регионун павильоннара туруоруллуохтара. Кыттааччылар ахсааннарыгар спорт министиэристибэтэ («Деловой» уонна «Арена ГТО» павильоннардаах), айылҕа министиэристибэтэ («Сокол дьиэтэ»), «Корпорация Туризм.РФ» АК, ону тэҥэ Уһук Илини уонна Арктиканы сайыннарыы Корпорацията “Уһук Илини сайыннарабыт» диэн концепциялаах.
Саха Сирин «Уһук Илин Уулуссатыгар» экспозицията регион стратегическай приоритеттарын — бигэ сайдыыны, инвестицияны, технологическай партнерствоны уонна аан дойдутааҕы бииргэ үлэлээһини көрдөрүөҕэ.
Дьон бөдөҥ промышленнай бырайыактары олоххо киллэрии, транспортнай уонна энергетическэй инфраструктураны сайыннарыы, цифровой быһаарыылары киллэрии, креативнай индустриялары сайыннарыы, предпринимательствоны өйөөһүн, ону тэҥэ экспорт уонна туристическай кыаҕы кэҥэтии туһунан билиэхтэрэ.
Экспозиция туспа салаата өрөспүүбүлүкэ ураты айылҕатыгар ананар. Манна Арктика бэлиэлэрэ — сэдэх туруйа, айылҕатыгар төннүбүт бизоннар уонна аатырбыт сэлии фауната көстөллөр.
Туристическай кэрэхсэбиллэргэ ураты болҕомто уурулунна. ЮНЕСКО Аан дойдутааҕы нэһилиэстибэтин испииһэгэр киирбит «Өлүөнэ остуолбалара» национальнай паарка көрдөрүллүөҕэ.
Павильоҥҥа олохтоох оҥорон таһаарааччылар бородууксуйаларын уонна сувенирдарын быыстапка-дьаарбаҥката үлэлиэҕэ. Култуура бырагыраамата үгэс буолбут фольклору, классическай уонна аныгы искусствоны түмүөҕэ. Саха сирэ үгэс курдук культурнай олох элбэх хайысхатын көрдөрөр — кэнники уон сылга олохтоох режиссердар киинэлэрэ Россия уонна норуоттар икки ардыларынааҕы киинэ бэстибээллэригэр 100-тэн тахса наҕарааданы ыллылар.
This post was published on 15.08.2025 14:29 14:29