Х Илиҥҥи экономическай форумҥа уопсайа 6 трлн 40 млрд солк.тахса суумалаах 283 сөбүлэһиигэ илии баттанна. Быйыл норуоттар икки ардыларынааҕы былаһаакка 75 дойдуттан уонна территорияттан 7300 киһини холбоото. Барыллаан түмүктэри РФ вице-премьерэ – президент Уһук илиҥҥэ боломуочуйалааҕа, ВЭФ-2025 тэрийэр кэмитиэтин бэрэссэдээтэлэ Юрий Трутнев иһитиннэрдэ.
«Форум биһиэхэ боростуой тэрээһин эрэ буолбатах, кыттааччылар ахсааннарын ааҕыы эрэ буолбатах, РФ президенэ Владимир Владимирович Путин Уһук Илин инники социальнай-экономическай сайдыытыгар сорудахтарын толорууга үлэни түмүктээһин. Уһук Илин сүрүн көрдөрүүлэринэн Россия орто көрдөрүүтүн урутаан иһэр. Чуолаан бу үлэ салгыы уларытыыларга тирэх буолбута», – диэтэ Юрий Трутнев.
Кини этэринэн, Уһук Илиҥҥэ судаарыстыба өйөбүлүнэн 2890 инвестиционнай бырайыак олоххо киирэр, инвестиция уопсай кээмэйэ 10,6 трлн солк., онтон 5,1 трлн солк. угуллубут. Ити 950 саҥа тэрилтэни тэрийэн, 170 тыһыынча киһи үлэни булбут.
«Билиҥҥи туругунан [ВЭФ-2025] уопсайа 6 трлн 40 млрд солк.тахса суумалаах 283 сөбүлэһиигэ илии баттанна. Судаарыстыбаннай өйөбүл көмөтүнэн олоххо киллэриллэр 5 трлн солк.бырайыактары кытта бу сыыппара тута үөскээбэтин чуолкайдыахпын баҕарабын. Ол гынан баран, сөбүлэһиилэргэ илии баттаммыт бырайыактар улахан өттүлэрэ олоххо киириэҕэ», – диэн Юрий Трутнев эттэ.
ВЭФ-2025 кэмигэр илии баттаммыт саамай улахан бырайыактар ахсааннарыгар Саха сирин уонна Уһук илин уонна Арктика сайдыытын Корпорациятын икки ардыларыгар сөбүлэһии буолара этилиннэ. Өрүттэр Алдан промышленнай кластерын тэрийэргэ сөбүлэстилэр. Бырайыагы олоххо киллэрии 16,7 тыһыынчаттан тахса саҥа үлэ миэстэтин таһаарыаҕа.
Санатан эттэххэ, Саха сирэ форумҥа уопсайа 106 миллиард солк.суумалаах 27 сөбүлэһиигэ илии баттаата.
“Үбүлүөйдээх ВЭФ ситиһиилээхтик ааста, дойду президенэ бэйэтин этиилэригэр инвестициялары тардыыга, валовой региональнай бородууксуйа кээмэйинэн, демографияҕа лидер быһыытынан ситиһиилэрбитин бэлиэтээбитэ мээнэҕэ буолбатах», – диэтэ Саха сирин баһылыга Айсен Николаев.
This post was published on 08.09.2025 11:34 11:34