Ыам ыйын 29-31 күннэригэр Дьокуускай куоракка ыытыллар тэрээһин креативнай индустрия исписэлиистэрэ түмсэр сирдэринэн буолуоҕа. Пуоруму РФ Уһук Илини уонна Арктиканы сайыннарыыга министиэристибэтэ, Уһук Илини уонна Арктиканы сайыннарыы корпорацията итиэннэ Саха сирин Бырабыыталыстыбата тэрийэллэр.
“Үлэ кыбартаала” креативнай кластерга Юрий Трутнев “Уһук Илиҥҥэ оҥоһулунна” креативнай оҥоһук битириинэтин көрдө. Экспозицияҕа Уһук Илин култууратын, аныгы креативнай быраактыкатын ураты оҥоһуктарын көрдөрөр Уһук Илин 11 эрэгийиэнин маастардарын, урбаанньыттарын үлэлэрэ турда.
Ураты болҕомто Саха сирин брендигэр уурулунна – илиинэн таптайыллыбыт быһахтартан саҕалаан көмүс оҥоһуктарга, анал байыаннай дьайыы дьоруойдарыгар аналлаах комикстарга тиийэ.
Итини сэргэ вице-премьер ааптардар таҥастарын, киэргэтиигэ туһаныллар биридимиэттэри, муостан уонна тимиртэн оҥоһуктары, остуол оонньууларын уонна ураты сувенирдары туруорбут Амур, Еврейскэй автономнай уобалас, Забайкальскай уонна Камчатскай кыраай экспозициятын сэҥээрдэ. Быыстапка кыттааччылара бэйэлэрин ураты оҥоһуктарын, өйөбүл миэрэлэр, пуорумҥа кыттыыларын туһунан кэпсээтилэр.
“Пуорум судургута суох олоххо кыра да буоллар үтүөнү, айымньылаах толкуйу, дьон ыратын, кинилэргэ кэрэ туһунан өйдөбүлү аҕалар. Бүгүн биһиги пуорумҥа харахтара уоттана сылдьар, бырайыакары олоххо киллэрэр, айар холбоһуктары түмэр креативнай уонна көхтөөх дьон баарын көрдүбүт. Бу көхтөөх санаа хас биирдии кэпсэппит дьоммутугар, идиэйэлэригэр баар. Бүгүн күннээҕи олоҕу айар үлэнэн, үтүөнэн, баҕа санаанан толорор улахан суолталаах. Креативнай толкуй дьон ураты быһаарыыны буларыгар, саҥаны, кэскиллээҕи ыраахтан көрөрүгэр көмөлөһөр” – диэн РФ Бырабыыталыстыбатын бэрэссэдээтэлин солбуйааччы — РФ Бэрэсидьиэнин Уһук Илиҥҥэ боломуочуйалаах бэрэстиибэтэлэ Юрий Трутнев этэр.
“Креативнай индустрия – Уһук Илин экэниэмикэтин суолталаах чааһа. Бүгүн бу эйгэнэн эрэгийиэҥҥэ үлэлиир дьон номнуо 9% дьарыктанар. Манна талааннаах дьон арыллан Арассыыйаҕа, ону тэҥэ, дойду тас өттүгэр билиниини ылар кыахтаах айар индустрия бүтүн экосистиэмэтэ тэриллэр. Уһук Илин куораттарын маастар-былааныгар креативнай эйгэни тэрийии көрүллэр. Кинилэртэн сирдьитинэн бүгүн пуорум ыытыллар “Үлэ кыбартаала” буолар. Сотору бу курдук кыбартааллар Благовещенскайга, Владивостокка, Улан Удэҕэ уонна Петропавловск-Камчатскай куораттарга аһыллыаҕа. Түмэл саҥа комплекстара уонна тыйаатыр үрдүк үөрэхтэрэ тэриллэллэр. Южно-Сахалинскайга номнуо Щукинскай театральнай институт филиала аһылынна, быйыл Благовещенскайга Арассыыйатааҕы тыйаатыр ускуустубатын институтун, Хабаровскайга Бүтүн Арассыыйатааҕы кинематография судаарыстыбаннай университетын филиалларын үлэҕэ киллэрэбит. Биири бигэтик этиэхпин сөп – бу сир айар кыаҕа муҥура суох! Биһиги сорукпут – ол сайдарыгар эбии көмөлөһүү” – диэн Алексей Чекунков бэлиэтээтэ.
“Биһиэхэ, Саха сирин олохтоохторугар экэниэмикэни уонна таска таһаарыны бииргэ түмэн болҕомто ууруллар Уһук Илин креативнай индустриятын пуорумун ыытар улахан чиэс. Биһиги өрөспүүбүлүкэбит – Уһук Илин уонна, уопсайынан, дойду креативнай экэниэмикэтин биир бастыҥнара. Биһиги атын эрэгийиэнтэн сылдьар биир идэлээхтэрбитин кытта үллэстэр холобурбут үгүс, кинилэртэн даҕаны үөрэнэрбит ирдэнэр. Маныаха анаан “Үлэ кыбартаалыгар”, федеральнай уокурукка бастакы кластерга креативнай индустрия саамай чаҕылхай бэрэстэбиитэллэрэ түмүстүлэр. Араас былаһааккаларга 6 тыһ. кэриҥэ киһи мустуоҕа, Уһук Илин бары эрэгийиэннэриттэн 300 кыттааччы кэлэрэ күүтүллэр, ону тэҥэ, тоҕус доҕордуу дойдуларбытыттан бэрэстэбиитэллэр кэлиэхтэрэ.
Хас биирдии киһи уопсай соругу ситиһэригэр – Уһук Илин культурнай, айар хапытаалын экэниэмикэтэ үрдээһинигэр бу бигэ тирэҕин инструменынан буолуоҕа” – диэн Ил Дархан Айсен Николаев кэпсиир.
Пуорум дьыалабыай бырагыраамтыгар 150-тан тахса тэрээһин киирэр. Манна 250-тан тахса спикер кыттыаҕа. Болҕомто киинигэр – киинэ, анимация, муода, муусука, геймдев, гастрономия, идэ быраактыката уонна цифровой айымньы. Пуорум иитинэн питчинг, маастар-кылаастар, панельнай дискуссиялар, төгүрүк остуоллар, стратегическай сессийэлэр буолуохтара.
Бу туһунан Ил Дархан уонна Бырабыыталыстыба пресс-сулууспата суруйар. Сиһилии манна ааҕыҥ.
Источник: Саха сирэ саайт.
This post was published on 29.05.2025 16:08 16:08