Култуура – норуот дууһата, сомоҕолоһуутун төрүтэ уонна көлүөнэлэри ситимниир күүс буолар. Бу элбэх норуоттаах, баай фольклордаах уонна талааннаах дьонноох Сахабыт сиригэр уратытык биллэр. Оттон эһиги норуоппут ураты баайын илдьэ сылдьаҕыт, култуурабыт уонна ускуустубабыт дьиктитин бэлэхтиигит уонна Саха сирин олохтоохторо аан дойду култууратын шедеврдэрин билэллэригэр төһүү буолаҕыт. Эһиги Кыайыыны чугаһатан, уопсай дьыалабытыгар сүдү кылааккытын киллэрэҕит, дойдубутун көмүскүүр буойуннарбыт санааларын көтөҕөҕүт. Онуоха
“Култуура волонтердара” доброволецтар хамсааһыннарыгар көхтөөхтүк кытталлар, буойуннарбытыгар уонна кинилэр дьиэ кэргэннэригэр көмөлөһөллөр. Россия уопсастыбатыгар устуоруйаҕа уонна үгэстэргэ сигэнэр, кэми уонна көлүөнэлэри ситимниир, омуктар биир сомоҕо буолалларыгар төһүү буолар уонна киһи айар-тутар, сайдар, баар кыаҕын туһанар аныгы култуура эйгэтин тэрийэргэ кыах биэрэр усулуобуйаны тэрийиэхтээхпит диэн дойдубут президенэ
Владимир Владимирович Путин бэлиэтээн эппитэ.
Култуурунай биир тэҥмитин, култуурабыт үгэстэрин, норуот уус-уран оҥоһуктарын чөл хаалларарга биһиги элбэҕи оҥоробут. Биһиги олоҥхобутун, ыһыахпытын, оһуохайбытын, хомуспутун дойдубутугар эрэ буолбакка, Россия тас өттүгэр киэҥник билэллэр, бу – Саха сирин култуурунай куодун тиэрдээччитэ буолар. Тыйаатыр диэйэтэллэрин, киинэ устааччылар, култуура тэрилтэлэрин иитиллээччилэрин сүҥкэн суолталаах ситиһиилэрэ биһиги профессиональнай
ускуустубабыт үрдүк таһымын туоһулууллар.
Бу ураты сыл, өрөспүүбүлүкэҕэ Култуура сылыгар, биһиги устуоруйа түбэлтэлэрин уонна интэриэһинэй бырайыактар туоһулара буолуохпут. Ол курдук, 240 үөрэнээччини батарар куорпустаах уонна 150 миэстэлээх интэринээттээх Муусука үрдүкү оскуолатын саҥа комплекса арыллыаҕа. Эпос уонна ускуустуба Арктикатааҕы киинэ тутулла турар. Быйыл А.С. Пушкин аатынан Нуучча драматическай тыйаатыра 135 сылын, П.А. Ойуунускай аатынан Саха
академическай тыйаатыра 120 сылын бэлиэтиибит.
Россия эдэр бибилэтиэкэрдэрин XII Форума, “Книжный ветер” II Норуоттар икки ардыларынааҕы бэстибээл, дойдубут бастыҥ түмэллэрин быыстапкалара ыытыллыахтара. Өрөспүүбүлүкэҕэ Олоҥхо Үһүс уон сыла Олоҥхо ыһыаҕынан арыллыаҕа.
Өрөспүүбүлүкэбит хас биирдии олохтооҕо уонна хотугу дойдубут ыалдьыттара бэйэлэригэр саҥаны уонна умсугутары булуохтара диэн бигэ эрэллээхпин, оттон бу сыллааҕы бырагыраамаҕа аҥардас бөдөҥ тэрээһин ахсаана 90-тан тахсар. Дьон өйө-санаата уларыйыы буола турар кэмигэр духуобунас сиэр-майгы үгэс буолбут сыаннастарыгар тирэҕирэр.
Күндү доҕоттор! Сыралаах үлэҕит, култуураны өрө тутаргыт, уопсастыба сомоҕолоох буоларыгар кылааккыт иһин махталбын тиэрдэбин! Эһиэхэ кытаанах доруобуйаны, уостубат иэйиини, саҥа бырайыактары уонна ситиһиилэри, көрөөччүлэр уонна ааҕааччылар билиниилэрин уонна махталларын баҕарабын!
Саха Өрөспүүбүлүкэтин Ил Дархана Айсен Николаев
