II Норуоттар ардыларынааҕы интеллектуальнай оонньууларга омук дойдуларыттан, Россия регионнарыттан, Саха сириттэн барыта 500-тэн тахса киһи кыттар. Тэрээһин Дьокуускайга бэс ыйын 30 — от ыйын 10 күннэригэр ыытыллар.
2022 сыллааҕы интеллектуальнай оонньууларга эдэр чинчийээччилэр, учууталлар, учуонай-экспертэр кыттыыны ылыахтара, суруйда YISG-2022 пресс-сулууспата.
Интеллектуальнай оонньуулар миэстэтигэр уонна тэйиччиттэн түһүмэхтэринэн ыытыллыахтара. Тэрийээччилэр иһитиннэрэллэринэн, манна Россия кристаллограф-теоретига, минералог, химик, педагог, Россия Наукаларын академиятын профессора Артем Оганов кэлиэҕэ.
Оонньуу үс сүрүн тэрээһинтэн турар: STEAM-бырайыактар, научнай конференция уонна математикаҕа, физикаҕа, химияҕа, информатикаҕа «Туймаада» олимпиадалара. Бэс ыйын 15 күнүгэр диэри математикаҕа, астрономияҕа, физикаҕа өрөспүүбүлүкэтээҕи Science Fair конференция-куонкуруска кыттарга сайаапка хомулунна.
This post was published on 16.06.2022 15:01 15:01