Япония NHK (Эн-Эйч-Кей) судаарыстыбаннай-уопсастыбаннай киин телерадио-хампаанньата былырыыҥҥыттан таас үйэтинээҕи киһи сири-дойдуну баһылааһынын саҕанааҕы кэми сырдатар улахан бырайыакка үлэлэһэр. Соторутааҕыта NHK SPECIAL CONTENT DEVEROPMENT CENTER ханаал үс киһилээх устар бөлөҕө Саха сиригэр кэлэн үлэлээтэ.
Япония документалистара – режиссер Кодзи Ясумото, оператор Такахаси Цуёси, тыаһын-ууһун таҥааччы Хирукава Кадзутака — түөрт күн устата Эркээнигэ, Буотамаҕа уонна Табаҕаҕа хас да эпизоду уһуллулар. Кинилэргэ Хаҥалас улууһуттан кыраайы үөрэтээччи Прокопий Ноговицын консультанынан сырытта. Ону сэргэ киинэҕэ оонньуур артыыстары сүүмэрдээһин эмиэ киниэхэ сүктэриллибитэ.
Айар бөлөх салайааччыта, Y-KEN FILM киинэ-хампаанньа режиссера Кодзи Ясумото билиммитинэн, бастаан утаа киинэни бүтүннүүтүн Японияҕа уһулар санаалаахтара үһү. Ол эрээри кэлин сорох эпизодтары Саха сиригэр устарга быһаарыммыттар уонна кэмсиммэтэхтэр — тыйыс дойду айылҕатын кэрэ көстүүлэриттэн, түҥ былыргы кэм булчуттарын оруолларыгар уһуллубут саха артыыстарыттан олуһун диэн астыммыттарын эттэ.
Дьон хотугу сиргэ олохсуйууларын көрдөрөр эпизодтарга олохтоох дьон уһулуннулар. Япония теледокументалистара Дьааҥы олохтооҕо, экстремал-айанньыт Ньургун Ефремов, идэтинэн булчут Эдуард Романов уобарастарын чаҕылхайдык арыйбыттарыттан астыннылар, дьиҥ-чахчы сонордьут дьон хамсаныылара ураты буоларын, хартыынаны киэргэтиэҕин бэлиэтээтилэр. Оттон биллиилээх спортсмен, Дыгын оонньууларын үс төгүллээх кыайыылааҕа Иннокентий Макаровы, дьоһун сэбэрэтин бэлиэтии көрөн, хаста да чугас былаантан уһуллулар.
Прокопий Ноговицын (бэйэтэ хас да киинэ ааптара, “Оҕо куйуурдуу турара” хартыыната былырыын Берлиналеҕа көрдөрүллүбүтэ) бырайыак биир тутаах үлэһитэ — оператор Такахаси Цуёси хайдах үлэлирин кэтээн көрбүтүн кэпсээтэ. Бары оператордар курдук, туохтан да чаҕыйбатын, аҥардас биир кадр инниттэн, тымныыны баардыылаабакка, чааһы-чааһынан кырааҥҥа тахсан турбутун, бэл артыыстар хайдах хамсаныахтаахтарын-имсэниэхтээхтэрин режиссер Кодзи Ясумотаны кытта сыа хаары кэһэ сылдьан көрдөрөн, быһааран биэрбитин, бииргэ үлэлиир дьонун айымньылаах үлэҕэ көҕүлүүрүн сөбүлүү көрбүтүн эттэ.
Күн тахсар дойдутун теледокументалистара, консультаннара, профессор Циньфу, тылбаасчыттара Анна Синькевич(Красноярскай), Алексей Ли (Сахалин) Хаҥалас сиригэр-уотугар түөрт күннээх сырыылара таһаарыылаах буолбутуттан астынан, үлэлэригэр көмө, сүбэ-ама буолбут доҕотторугар истиҥник махтанан, салгыы Томпо улууһугар айаннаатылар.
