Дмитрий Коркин аатынан норуоттар икки ардыларынааҕы күрэхтэһиигэ Дьокуускайга Японияттан бөҕөстөр кэлиэхтэрэ. Кинилэр хас да сыл устата бу турнирга кыттыбатылар. Бу туһунан өрөспүүбүлүкэтээҕи сүүмэрдэммит хамаандалар спортивнай бэлэмнэниилэрин киинигэр иһитиннэрдилэр, диэн ЯСИА биэрэр.
Хамаанданы тренер быһыытынан аан дойду чемпиона Юки Такахаси салайан аҕалыаҕа. Биллэр тустуук кыттааччылар эдэр эрээри кэскиллээх састааптарын бэлэмниир. Японецтар кылгас кэм иһигэр аан дойду тустуутун лидердэрин бэлэмниир кыахтаахтарын хаста да дакаастаабыттара. Сэтинньи 15-16 күннэригэр “Триумфка» Коркин турнирын мэтээллэрин иһин кэскиллээх тустууктар киирсиэхтэрин сөп.
Япония хамаандатын лидеринэн эр дьоҥҥо Азия чемпиона Такара Суда ааттыахха сөп. Кинини кытта аан дойду күрэхтэһиилэрин мэтээллэрин хаһаайыннара кэлиэхтэрэ.
САССР, РСФСР уонна ССРС үтүөлээх тренерэ Дмитрий Коркин аатынан норуоттар икки ардыларынааҕы күрэхтэһии сэтинньи 15-16 күннэригэр «Триумф» спорткомплекска буолуоҕа.
Япония хамаандатын састааба:
Такара Суда — эр дьоҥҥо Азия чемпиона (2025), Венгрияҕа ыытыллыбыт норуоттар икки ардыларынааҕы турнир 61 киилэҕэ диэри ыйааһыҥҥа кыайыылааҕа;
Рейджи Учида — 65 киилэҕэ диэри эдэрдэргэ аан дойду күрэхтэһиитин (2025) үрүҥ көмүс призера;
Андо Шинго — 74 киилэҕэ диэри эдэрдэргэ аан дойду күрэхтэһиитин (2024) боруонса призера;
Йонаширо Итсуки — 60 киилэҕэ диэри уолаттар ортолоругар аан дойду күрэхтэһиитин (2024) боруонса призера;
Таиго Ожино — 60 кг диэри ыйааһыҥҥа уолаттар ортолоругар аан дойду күрэхтэһиитин (2022) боруонса призера;
Даито Кацуми — 65 киилэҕэ диэри диэри эдэрдэргэ Азия күрэхтэһиитин кыттыылааҕа;
Татсужи Ямага.
Санатан эттэххэ, Саха сирин сүүмэрдэммит хамаандатын састаабыгар Россия вице-чемпиона Константин Капрынов кыттар, кини хамаанда хапытаана.
This post was published on 06.11.2025 11:03 11:03