Каролина Протопопова 5 кылааска Салбаҥ оскуолатыгар үөрэнэр. Кини ынах ыырын сөбүлүүрүн @gazetaensieli суруйда. Тыа хаһаайыстыбатын министиэристибэтэ үчүгэй сонуну бэйэтин ТГ-ханаалыгар таһаарда.
Каролина суруга:
Биһиги 7 ыанар ынахтаахпыт, онтон үһүн мин ыыбын, ийэбэр көмөлөһөбүн. Рапунцель, Золушка, Сиренга диэн ынахтары ыыбын. Рапунцеллаах Золушка эмиийдэрэ уһун эрээри, кытаанах. Ол иһин ытыспынан күүскэ тутан ыыбын. Сиренга киэнэ сымнаҕас эрээри, кыра, ол иһин тарбахтарбынан сыыйан ыыбын. Эбэм Суракай урут дайааркалаабыт буолан, ынах туһунан элбэҕи этэр, сүбэлиир. Ол курдук, ынах кутуруга такымыттан уһун буоллаҕына, ити аата үүттээх ынах бэлиэтэ диир. Ынах муоһугар баар сурааһыннар хаста төрөөбүтүн бэлиэтииллэр. Өссө онно икки сааһы эптэххэ – сааһа тахсан кэлэр. Төрөөбүт ынах оҕотун эмтэрбэт буоллаҕына, хайаатар да кыаһынан кэлин атахтарын кытаанахтык баайан эмтэриллиэхтээх. Үүтэ бастаан сап-саһархай, хоп-хойуу буолар, ону уоһах дииллэр, уоһаҕы эмтэҕинэ, ньирэй түргэнник улаатар. Ити курдук, эбэм аргаайдык кэпсиир, «туһаныаххыт» диир.
Кыысчаан эбэтин сүбэлэрин СИА ааҕааччылара эмиэ сэргиэхтэрэ дии саныыбыт.
