Саха сиригэр ыам ыйын 30 күнүнээҕи ат сүүрдүүтэ НВК «Саха» ханаалыгар уонна YouTube-ка көстүөҕэ. Күрэхтэһии аан бастаан онлайн-эрэһииминэн, трибунаҕа көрөөччүтэ, ыһыыта-хаһыыта суох ыытыллыаҕа.
Саха сирин ат спордун Федерациятын пресс-киинигэр иһитиннэрбиттэринэн, быйылгы сүүрдүү Кыайыы 75 сылыгар ананар уонна 2020 сыл сезонун арыйар.
«Дьокуускайга ыытыллар, Арктикатааҕы судаарыстыбаннай агротехнологическай университет ипподромугар. Быһа холбонууну НВК «Саха» уонна «Вестник Арктического ГАТУ» YouTube ханаалыгар көрүөххэ сөп, — диэтилэр тэрийээччилэр.
Аҕыс киирсии олохтонор: 800, 1200, 1400, 1600, 1800, 2000, 2400 уонна 3200 м. Хас биирдии дистанция сахалартан Сэбиэскэй Союз Геройа үрдүк ааты ылбыттарга уонна Аҕа дойду улуу сэриитин бэтэрээннэригэр ананар.
Сэбиэскэй Союз Геройдарын ааттарынан бириистэр олохтоннулар: Николай Чусовской, Николай Кондаков, Владимир Лонгинов, Федор Попов, Федор Охлопков. Аҕа дойду улуу сэриитин бэтэрээннэрин ааттарынан бириистэр: Гавриил Протодьяконов, Петр Яковлев, Семен Флегонтов, Георгия Федоров уонна снайпер Иван Кульбертинов. Уопсай бириис пуондата — 590 тыһ.солк.
Кэлэр өрөспүүбүлүкэтээҕи ат сүүрдүүтэ бэс ыйын 6 күнүгэр былааннанар, Ил Дархан бирииһигэр сүүмэрдиир түһүмэх быһыытынан ыытыллыаҕа.
This post was published on 25.05.2020 14:03 14:03