Бу туһунан Дьокуускайдааҕы айылҕа харыстабылын кэмитиэтэ суруйар.
«Фамильное дерево» аахсыйа айылҕаҕа харыстабыллаах сыһыаны бигэтик олохтуур, күөх үүнээйини, маһы, талаҕы олордор уонна тиһиктээхтик көрөн-харайан, бүөбэйдээн үүннэрэри ситиһэр сыаллаах-соруктаах ыытыллар. Тэрээһиҥҥэ Дьокуускайга олорор ыаллар, үлэһит династиялар, бэтэрээннэр кытталлар. Мастар, талахтар анал ыйыллыбыт миэстэлэргэ олордуллаллар диэн быһаараллар.
Ирдэбил быһыытынан аахсыйаҕа кыттааччылар 5 мүнүүтэлээх видеоролик бэлэмниэхтээхтэр. Онно дьиэ кэргэн хас биирдии чилиэнэ маһы, талаҕы хайдах олордоро көрдөрүллүөхтээх. Мультимедийнай бырайыактары атырдьах ыйын бүтүүтэ «Сибэкки бэстибээлэ» диэн куорат тэрээһинигэр көмүскүөхтэрэ.
Куонкуруска киллэриллибит үлэлэри дьүүлүүр сүбэ сыаналыыр. Кыайыылаахтар Дьокуускай куорат дьаһалтатын махтал суруктарынан, бириистэринэн наҕараадаланыахтара.
This post was published on 07.05.2018 16:37 16:37