Тэтимнээх үһүс үөрэх оҥкулун түмүктээн баран, «Якутия – Земля Героев» кадр бырагырааматын кыттыылаахтара алта нэдиэлэлээх стажировкаҕа киирдилэр. Курсаан Валерий Петров «Республиканский методический центр психолого-педагогического сопропения» тэрилтэҕэ быраактыкаланар.
Стажировка бастакы күннэригэр курсаан киин исписэлииһэ Анна Тимофееваны кытта Таатта улууһугар командировкаҕа таҕыста. Кинилэр үөрэх үлэһиттэрин үгэс буолбут олунньутааҕы мунньахтарыгар кытыннылар.
Күн бастакы аҥарыгар төрөппүттэри кытта көрүстүлэр уонна семинары ыыттылар, онтон кэлин «Механизмы и инструменты качественного обучения и воспитания детей» диэн тиэмэҕэ пленарнай мунньахха кытыннылар. Таатта улууһун баһылыга Айаал Бурцев, Саха сирин үөрэҕин министиэристибэтин бэрэстэбиитэллэрэ уонна да атын эспиэрдэр дакылааттаатылар.
«Ырытыыны уонна стратегическай соруктары бастакы сирэйтэн истэр олус наадалаах. Тэрээһин үрдүк таһымнаахтык, дьиҥнээх сахалыы далааһыннаахтык, сылаастык ааста. Миэхэ бу Таатта улууһугар бастакы сырыым – баай историялаах, култууралаах сир, үгүс уһулуччулаах дьон дойдулара буолар. Стажировкам күүстээхтик уонна үрдүк эппиэтинэстээхтик саҕаланна. Инники саҥа соруктарга!», — диэн Петров бэйэтин социальнай ситимнэригэр суруйда.
Курсааннарга стажировка — бырагыраамаларын тутаах түһүмэҕэ, онно түөрүйэ быраактыканы кытта алтыһар. Быраактыка кинилэргэ судаарыстыбаннай уонна муниципальнай салайыы систиэмэтин кытта билсиһэллэригэр уонна олохтоох соруктары быһаарыыга бэйэлэрин кылааттарын киллэрэллэригэр кыах биэрэр.
Ил Дархан Айсен Николаев көҕүлээһининэн өрөспүүбүлүкэҕэ «Якутия – Земля героев» кадр бырагыраамата олоххо киирэр. Кини сүрүн соруга — регион туһугар кэскиллээх салайар кадрдары бэлэмнээһин. Бырагыраама Россия президенэ Владимир Путин тэрийбит «Геройдар кэмнэрэ» федеральнай көҕүлээһин салҕыыта буолар.
This post was published on 10.02.2026 15:06 15:06