«Якутия» авиакомпания тупсарыллыбыт Sukhoi Superjet 100 сөмөлүөтү атыыласта. Саҥа лайнер хоту сир усулуобуйатыгар сөп түбэһиннэриллибит, онон Уһук Илиҥҥэ, Сибииргэ аара суолга тохтоон олоруута суох көтөр кыахтаах.
«Якутия» авиакомпания сайдарыттан үөрэбит. Өрөспүүбүлүкэ бырабыыталыстыбатын өйөбүлүн компания дьиҥнээх дьыалаҕа көрдөрөр», — диэн СИА-ҕа Саха сирин вице-премьера Виктор Омуков эттэ.
SSJ100 кэскиллээх тырааныспар буоларын компания үлэһиттэрэ бэлиэтииллэр. Генеральнай дириэктэр Ольга Федорова этэринэн, инникитин да «Сухой гражданскай сөмөлүөттэрэ» АО оҥорон таһаарар көтөр аалларын компания атыылаһыаҕа.
Бу компанияҕа төрдүс сөмөлүөт буолла. Атыттары кытта тэҥнээтэххэ, 500 м уһуннук көтөр. Ону таһынан тутулларыгар Саха сирин киллэрбит этиилэрэ аахсыллыбыттар.
SSJ100 авиалайнер быйыл тутуллубут, «Long Range» тупсарыллыбыт модификациялаах.
Инженернэй-техническэй биригээдэ сөмөлүөт бары систиэмэтин үлэлэтэн, көтүтэн көрдө. Лайнер куттал суох буолуутугар баар ирдэбиллэргэ толору сөп түбэһэр. Бу күннэргэ сертификаты ылан рейстэри толорор соруктаах.
Sukhoi Superjet 100 дойду салгынын тырааныспарын судаарыстыбаннай бырагырааматын чэрчитинэн атыыластылар.
