Кэлэр нэдиэлэттэн «Якутия 24» телеханаалга «Саха тылын үөрэтиэхпит» диэн интеллектуальнай реалити-шоу саҕаланар. Ыытааччы, уһуйааччы — биллиилээх полиглот, тыллары түргэнник үөрэтэр ураты оҥкул ааптара Дмитрий Петров.
16 дьарык иһигэр бырайыак кыттыылаахтара саха тылын билиигэ бастакы холонууттан саҕалаан, сүрүн билии таһымыгар диэри суолу-ииһи ааһыахтара. Дмитрий Петров тыл уратытын уонна култууратын учуоттаан, аатырбыт оҥкулун саха тылыгар анаан-минээн эллээн оҥорон таһаарда. 30-тан тахса тылы баһылаабыт полиглот тыл матырыйаалын көдьүүстээхтик өйдүүргэ уонна сааһылаан туттарга кистэлэҥнэри арыйыаҕа.
Бырайыакка араас идэлээх, саастаах 15 киһи кыттар: суруйааччылар, артыыстар, таҥара үлэһиттэрэ, преподавателлэр, бибилэтиэкэрдэр, устудьуоннар уонна оскуола оҕолоро. Олор ортолоругар Саха сирин нууччалыы тыллаах олохтоохторо да, омук устудьуоннара да бааллар. Сахалыы тыллаах эйгэҕэ олорбуттарын да иһин, үгүстэр тылы билиигэ бастакы холонуулара.
Бырайыак тэрийээччитэ — Саха сирин национальнай бибилэтиэкэтэ, уһулуута, таҥыыта тэрилтэ медиакиинигэр ыытылынна. Бибилэтиэкэ үлэһитэ, фантаст-суруйааччы Максим Эверстов эмиэ үөрэнээччи быһыытынан кытынна. «Мин фольклорга үлэлиирбэр култуураны өйдүүрбэр бу бырайыак көҕүлээтэ. Бырайыак көмөтүнэн эксперимент буолла. Саха тылын харыстааһыҥҥа кылааппыт уонна билиҥҥи үйэҕэ саха тылын киэҥ эйгэҕэ тарҕатыыга быһаарыыбыт буолар”, — диэтэ кини.
«Саха тылын үөрэтиэхпит» интеллектуальнай реалити-шоу оптуорунньуктарга 9.30 чааска уонна баскыһыанньаларга 19.30 чаастан «Якутия 24» ханаалга тахсыа.
