Алтынньы 12 күнүгэр Дьокуускайга ис дьыала урукку миниистирин Яков Стаховы тутан изоляторга уктулар.
Яков Стахов Дьокуускайга баарын туһунан сурах уонна маҕаһыыҥҥа атыылаһа сылдьар хаартыската социальнай тиһиктэринэн өссө балаҕан ыйыгар тарҕаммыта. Ол эрээри хаартыскаҕа баар киһи кини буолбтаҕын туһунан ИДьМ эппиттэрэ.
«Стахов билигин силиэстийэлиир изоляторга баар. Биһиги холуобунай дьыаланы сөргүттүбүт. Ити дьыала кини куоппутуттан сылтаан тохтотулла сылдьыбыта», — диэтэ силиэстийэ управлениетын салайааччытын көмөлөһөөччүтэ Надежда Дворецкая.
Стахов миниистир эрдэҕинэ хоруупсуйаҕа, дуоһунаһын үрдэтиигэ, баайы-дуолу түөкүннээһиҥҥэ буруйдаммыта. Ону таһынан Mercedes массыынаны уоргууга кыттыгастааҕа. 2012 сыл кулун тутар 16 күнүгэр кинини хаайар туһунан быһаарыыны суут ылыммыта. Стахов куораттан барыа суохтааҕа. Ол эрээри кини итини кэһэн туран Москваҕа күрээбитэ. 2012 сылга кинини дуоһунаһыттан тохтоппуттара уонна холуобунай дьыаланы саҕалаабыттара.
Биэдэмистибэ урукку салайааччыта уорбаланааччы быһыытынан доппуруоска ыҥырыллыбыт күнүгэр куотан хаалбыта. Кэлин биллибитинэн, Дьокуускай аэропуордугар ТЛК-200 массыына көтөр балаһаҕа киирэн, кини сөмөлүөккэ быһа олорбута. Стахов онно пассажир быһыытынан бэлиэтэммэтэх этэ.
This post was published on 14.10.2016 11:14 11:14