Ыскылаат комплекса — Wildberries логистическай киинин Старай Табаҕаҕа тутар былааннаахатар. Бу туһунан өрөспүүбүлүкэ экономикатын миниистирин солбуйааччы Анна Кокорина кэпсээтэ.
«Сүрүн инвестбырайыак — ыскылаат комплекса-логистическай киин. Билигин кэпсэтии барар. Билигин барыллаан көрүүнэн, тутулла турар Өлүөнэ муостата ааһар Старай Табаҕаҕа ыскылаат тутуллар миэстэтин көрөбүт. Бу бырайыак саҥа үлэ миэстэтин элбэтиэҕэ, олохтоох бизнескэ эмиэ үчүгэйдик дьайыа, тоҕо диэтэххэ логистическай ороскуот, тырааныспар ороскуота лаппа кыччыа», — диэн sakha.gov.ru портал Анна Кокорина тылларын суруйар.
Миниистир солбуйааччыта өрөспүүбүлүкэ Wildberries & Russ кытта бииргэ үлэлээһинэ ыскылаат комплексын тэрийиинэн муҥурдамматын этэр. Сотору кэминэн Саха Сирэ АСИ хампаанньа үлэҕэ киллэрбит «Үүнүү платформата» акселерационнай бырайыагар кыттыаҕа. Маны сэргэ, кини этэринэн, олохтоох брендэри билиһиннэрэр «Саха сиригэр оҥоһуллубут» диэн салааны Wildberries маркетплейска тэрийэр туһунан сөбүлэһии ситиһилиннэ.
ВЭФ-2025 былаһааккатыгар инвестиционнай бырайыагы олоххо киллэрии туһунан сөбүлэһиигэ Саха сирин баһылыга Айсен Николаев уонна Wildberries тэрийээччитэ, РВБ баһылыга Татьяна Ким илии баттаатылар.
Санатан эттэххэ, ВЭФ-2025 түмүгүн таһааран, Россия президенэ Владимир Путин кэнники 10 сылга Уһук Илин субъектарын ортотугар сүрүн капиталга 4,5 трлн солк. инвестициялаах Саха сирэ лидер буоларын бэлиэтээтэ.
This post was published on 11.09.2025 17:33 17:33