18 От ыйа 18.07
  • 17°
  • $ 88,09
  • 96,3

Владимир Путин: биэтэҥниирбитигэр бириэмэ суох

19:59, 07 мая 2018
Текст:
Читайте нас на
Яндекс Новости
ЯДВ

Владимир Путин Москва бириэмэтинэн күнүс 12 чааска РФ президенинэн олохтоохтук олордо. Инаугурация кэмигэр Владимир Владимирович дьонугар-сэргэтигэр махтанан туран, инники үлэтигэр наукаҕа, үөрэххэ, доруобуйа харыстабылыгар, дьон олоҕун тупсарыыга ордук болҕомто ууруоҕун иһитиннэрдэ.

“Россия кэми-кэрдиини кытары тэҥҥэ хаамсан иһиэхтээх, биир тиһиктээхтик сайдан барыахтаах. Хас биирдии хайысхаҕа тоҕо анньан инники күөҥҥэ тахсыахтаахпыт, оттон үгэскэ кубулуйбут хайысхаларбытыгар бастыҥ буоларбыт ирдэниллэр. Онуоха харыны ньыппарынан туран, үлэлиирбит-хамсыырбыт, олохпутун, сайдыыбытын бэйэбит илиибитигэр ылан, эппиэтинэһи хас биирдиибит сүгэрбит наада. Сайдыы хаһан баҕарар уустук буолар. Судургу суол диэн суох. Чуолаан билигин, уларыта тутуу кэмигэр, олорон хааларбыт табыллыбат,” – диэн бэлиэтиир кини.

Онуоха кини уопсастыба санаатын аһаҕастык этэр, кимтэн да, туохтан да куттаммакка инникитин диэки дьулуурдаахтык хардыылыыр, эппиэтинэстээх, дойдутугар бэриниилээх буоллаҕына сайдыыбыт тэтимнээх буолуоҕун туһунан иһитиннэрдэ. “Аан дойду сайдыытын кытары тэҥҥэ хаамсабыт. Ол сиэрдээх. Ол эрээри бэйэбит үгэспитин, историябытын, култуурабытын, олохпут оҥкулун умнарбыт сатаммат.  Биһиги күүспүт төрүт үгэспитигэр уонна биир санаалаахпытыгар сытар. Биһиги ону дьэҥкэтик өйдүүбүт. Төһөнөн бэйэ-бэйэбитигэр көмөлөсүһэбит, итэҕэйэбит, эрэнэбит, хас биирдиибит дойдубут сайдыытыгар кылаатын киллэрсэр да, оччонон биһиги күүһүрэн иһиэхпит. Биһиги үлэбитин туораттан кэлэн ким да оҥоруо суоҕа. Ону өйдүөххэ”, — диэн этэр кини.

Владимир Путин судаарыстыбаннай уонна муниципальнай былааска туһаайан, нэһилиэнньэ хас биирдии кыһалҕатыгар, туруорсар боппуруоһугар ураты болҕомтону уурарга эттэ. “Олохтоохтор эһиэхэ тустаах кыһалҕаларын быһаартараары кэлэллэр, быһаартарыахтарын баҕараллар. Дьон-сэргэ кыһалҕатыгар эппиэтинэстээхтик сыһыаннаһыы, кинилэр санааларын, этиилэрин истии, аламаҕай, сайаҕас буолуу былаас хас биирдии таһымыгар баар буолуохтаах”, — диэн бэлиэтиир кини.

Ону таһынан инникитин үөрэххэ, доруобуйа харыстабылыгар, ийэ уонна оҕо сайдыытыгар ураты болҕомто ууруллуоҕун туһунан эттэ. “Биһиги эрэлбит – оҕолорбутугар, ыччаппытыгар. Доруобай, үөрэхтээх ыччат үүнэн тахсарыгар бары усулуобуйаны тэрийиэхпит. Ыччаппыт кэнэҕискитин инники күөҥҥэ тахсыахтаах. Билиҥҥи оҕолор төрөппүттэринээҕэр өссө таһаарыылаахтык үлэлиэхтээхтэр. Онуоха көлүөнэлэр алтыһыылара улахан суолталаах”, — диэн этэр дойду президенэ.

Уонна түмүккэ Владимир Владимирович: “Төттөрү-таары биэтэҥниирбитигэр бириэмэ суох. Россия тыһыынчанан сылларга араас кэми барытын туораан ааспыта. Ол эрэн феникс чыычаах курдук тиллэн испитэ. Россия үрдүкү чыпчаалы дабайбыта. Атыттар “кыаллыбат” диэбит суолларыгар, биһиги саҥаттан саҥа түһүмэххэ тахсан испиппит. Билигин да биһиги өссө да үрдүк чыпчаалы ситиһиэхпит. Тоҕо диэтэргин, биһиги биир хамаандабыт. Россия, дойдубут сайдарын, хас биирдии ыал дьоһун олохтонорун туһугар мин, президент быһыытынан, туох баар күүспүн-уохпун, дьаныарбын, дьулуурбун, кыахпын барытын ууран туран үлэлиэҕим. Бар дьоммор быыбар кэмигэр биир санааны тутуһан миэхэ итэҕэйбиккит, эрэммиккит иһин истиҥник махтанабын”, — диэн иһитиннэрдэ.

Аграфена КУЗЬМИНА, “Саха сирэ” хаһыат.

 
Следите за самым важным и интересным в Telegram-канале и WhatsApp-группе ЯСИА