Бүтүн Россиятааҕы өйдөбүл күннэр халандаардарыгар балаҕан ыйын 25 күнүн Уһук Илин күнүнэн биллэрэр туһунан көҕүлээһини Дьокуускайга Владимир Путин приемнайыгар киллэрдилэр. Өрөспүүбүлүкэҕэ Нуучча географическай уопсастыбатын отделениетын бэрэссэдээтэлэ Александр Горохов этиини оҥордо.
Маны сэргэ кини Владимир Путиҥҥа Уһук Илиҥҥэ уонна Арктикаҕа биир кэлим научнай экспедицияны бары хайысханан ыытар наадалааҕын эттэ. История, норуоттар култууралара уонна тыллара, экология, килиимэт уларыйыыта барыта киириэхтээҕин туһаайда.
Горохов этэринэн, чинчийиилэргэ Россиятааҕы наука академиятын Сибиирдээҕи отделениетын Саха сиринээҕи наукатын киинин учуонайдарын уонна Россиятааҕы географическай уопсастыба өрөспүүбүлүкэтээҕи отделениетын кытыннарар наада.
Владимир Путин уопсастыбаннай приемнайа Дьокуускайга 2023 сыл ахсынньытыттан үлэлиир.
