Кэлэр кыстык уруккутааҕар тымныы буолуо эрээри, температура ортотунан нуорма кэриҥэ итиэннэ оннооҕор үрдүк буолуо, диэн кэпсээтэ ТАСС Россия Гидромет киинин научнай салайааччыта Роман Вильфанд.
«Кыһыҥҥы барыллааһыны таһаарбыппыт, Гидрометкиин саайтыгар бэчээттэммитэ. Эрдэттэн билгэлээһин маннык, быйылгы кыһын температура ортотунан нуорма кэриҥэ, оннооҕор үрдүк буолуо. Уопсайынан, тымныы кыһын буолбатах, ол гынан баран, былырыыҥҥы кыһыны кытта тэҥнээтэххэ, температура биллэ намыһах буолара сабаҕаланар», — диэн кэпсээтэ.
Ол курдук, Гидрометкиин сайтыгар бэчээттэммит билгэлээһиҥҥэ олоҕуран, Россия территориятын үксүгэр ый орто температурата ахсынньыга элбэх сыллаах орто көрдөрүү кэриҥэ күүтүллэр; нуорматтан намыһах — Уһук Илиннээҕи федеральнай уокурук хотугулуу-илин өттүгэр. Россия бүтүн территориятыгар кэриэтэ ахсынньы орто температурата 2024 сыллааҕар намыһах сабаҕаланар.
2026 сыл тохсунньутугар Россия сиригэр-уотугар элбэх сыллаах орто көрдөрүүгэ чугас температура эрэһиимэ туруоҕа. Онуоха Россия европейскай территориятын үксүгэр, Урал уонна Сибиир федеральнай уокуруктарын киин уонна соҕуруу регионнарыгар тохсунньу ыйа, 2025 сылга холоотоххо, лаппа тымныы күүтүллэрин Гидромет киинигэр бэлиэтииллэр.
2026 сыл олунньутугар нуорматтан үрдүк орто ыйдааҕы салгын температурата Киин уонна Соҕуруу федеральнай уокуруктар илин өттүлэригэр, Приволжскай федеральнай уокурук үксүгэр, Урал федеральнай уокуругар уонна Сибиир федеральнай уокуругун арҕаа өттүгэр сабаҕаланар. «2025 сыл олунньутугар холоотоххо, сылаас Соҕуруу федеральнай уокурук үгүс регионнарыгар күүтүллэр; тымныы — Красноярскай кыраай хотугу аҥарыгар, Саха сирин арҕаа өттүгэр», — диэн саайтка ыйыллар.
This post was published on 10.10.2025 15:22 15:22