Потапов Виктор Филиппович — Саха сирин үөрэхтээһинигэр бөдөҥ кылааты киллэрбит Арассыыйа Бэдэрээссийэтин уонна Саха Өрөспүүбүлүкэтин үтүөлээх учуутала, дьоҕурдаах оҕолору көрдүүр уонна сайыннарар Саха Өрөспүүбүлүкэтин «Дьоҕур» уопсастыбатын тэрийээччилэртэн биирдэстэрэ, өрөспүүбүлэтээҕи лиссиэй физикаҕа учуутала.
Виктор Филиппович Саха сирин бастакы бэрэсэдьиэнэ дьоҕурдаах оҕолорго туһааннаах хайысхатын туһунан санаатын үллэһиннэ, атын хайысхатын ырыппапын диэн тута чопчулаата.
— Дьоҕурдаах оҕолору кытта үлэҕэ «Өлүөнэ сирин» форумун тэрийии, ону туспа тутан үбүлээһин, инникигэ улахан хардыы этэ. Бастакы ыытыллыбыт форум Арассыыйа сүрүн үрдүк үөрэх кыһаларын кытта ситими олохтообута күн бүгүнүгэр дылы туттулла турар. Бу Михаил Ефимович дьаһала элбэх дьоҕурдаах ыччат инники дьылҕатын үчүгэйгэ быһаарбыта.
Президент ситимин оскуолаларын тэрийии — саҥа атахтарыгар туран эрэр гимназиялар, предметтэри дириҥэтэн үөрэтэр кылаастардаах оскуолалар салгыы сайдалларыгар күүстээх көмө буолбута. Оннук оскуолаларга туспа үбү көрүүгэ Михаил Ефимович эмиэ элбэх кылаатын киллэрбитэ. Кини уурайбытын кэннэ, ол тохтообута уонна, хомойуох иһин, барыта сүппүтэ.
Эдэр учууталлары Арассыыйа сүрүн үрдүк үөрэх кыһаларыгар араас курстарга ыытан үөрэттэрии кини быһаччы сорудаҕынан тэриллибитэ. Ол үлэ түмүгүн бу билигин туһана олоробут. Михаил Ефимович салайар кэмигэр «Сүүс аспирант учуутал» диэн бырагыраама олоххо киирбитэ.
Санатан эттэххэ, Виктор Филиппович Потапов быйыл Саха сириттэн бастакынан “Народный учитель Российской Федерации” үрдүк ааты ылбыта.
Ааптар: Мария Горохова, СИА
Хаартыска: В.Ф. Потапов архыыбыттан.
