Сэрэбиэй кэнниттэн быһаарыллыбытынан, Виктор Лебедев Азия чөмпүйүөнүн, Индия спортсменын Сандип Томары кытта көбүөргэ аан бастаан тахсар буолла. Бүгүн, атырдьах ыйын 19 күнүгэр, Дьокуускай бириэмэтинэн 22:00 чааска бу тустууну көрүөхпүт.
Сандип Томар норуоттар икки ардыларынааҕы турнирдарга элбэҕэ суох кыайыылаах. Быйыл Азия чемпионатыгар кыайбыта, Испанияҕа үрүҥ көмүс мэтээли ылбыта, байыаннай сулууспалаахтар ортолоругар аан дойду чөмпүйүөнэ. Урукку өттүгэр Томар уонна Лебедев көбүөргэ көрсө иликтэр.
Лебедев кинини кыайдаҕына, Хасан Рахими кытта тустуоҕа. Тустууну сэҥэрээччилэр кинини Лебедев сүрүн утарсааччытын быһыытынан сыаналыыллар. Рахими аан дойду чемпионаттарыгар 2013 сыллаахха «кыһыл көмүһү», 2015 сыллаахха «үрүҥ көмүһү», уонна 2011, 2015 сылларга «боруонсаны» ылбыта, ону таһынан Азия чөмпүйүөнүн үрдүк ааты ситиспит спортсмен.
Рахими уонна Лебедев урукку өттүгэр туста сылдьыбыттара. Лас-Вегаска аан дойду чемпионатыгар Лебедев киниэхэ 0:5 ахсаанынан хотторбута. Оттон 2014 сыллаахха аан дойду Кубогар Лебедев кинини кыраһыабайдык кыайбыта.
This post was published on 19.08.2016 12:07 12:07