Россия спордун миниистирин атырдьах ыйын 28 күнүнээҕи бирикээһинэн, Виктор Колибабчукка «Мас-рестлиҥҥа норуоттар икки ардыларынааҕы кылаастаах Россия спордун маастара» аат иҥэрилиннэ. Бу туһунан Фейсбугар суруйда.
“Барыта 2009 сыллаахха Владимир куоракка саҕаламмыта. Россия бастакы чемпионатыгар кыттыбытым. Евгений Сивцев кэнниттэн иккис буолбутум. «Абсолюткаҕа» Анатолий Баишевка хотторбутум. Бу түмүгүм Бүлүү куоракка дойду бастыҥ мас тардыһааччыларын ортотугар киирсэрбэр кыаҕы биэрбитэ. Онно «Манчаары Оонньууларын» чэрчитинэн Россия чемпионата ыытыллыбыта, муҥутуур кыахтааҕы быһаарсыы буолбута.
Өйбүн да булларбакка, онно эмиэ бу саха муҥутуур күүстээхтэрин кытта утары киирсиигэ сэрэбиэй быраҕыллыбыта. Биллэн турар, иккиэннэригэр хотторбутум. Түмүккэ — ахсыс эрэ миэстэ буолбутум. Ити эрээри бу мин суолум арыллыыта. Чуолаан кинилэр кыайыыларыгар, мин хотторууларбар — дьарыгым саҕаламмыта. Бу икки саха спортсменыгар мас-рестлинг мындырдарыгар үөрэммитим”, – диэн суруйар Виктор Колибабчук.
