Верхоянскайга атырдьах ыйын 19 күнүгэр халаан уутуттан инженернэй көмүскэнэр эбийиэк – 9 км-тан тахса уһуннаах дамба тутуута саҕаланна. Саҥа тутуу халаан уутун утары эрэллээхтик үлэлиэ уонна куорат олоҕор куттала суох усулуобуйаны тэрийэргэ аналлаах. Тутууга официальнай саҕалааһыны Саха сирин вице-премьерэ Ольга Балабкина биэрдэ. Бу туһунан өрөспүүбүлүкэ баһылыгын уонна бырабыыталыстыбатын пресс-сулууспата иһитиннэрэр.
«Бу бырайыак былаас уонна нэһилиэнньэ көхтөөхтүк бииргэ үлэлээһинин көмөтүнэн кыаллар буолла, онно Саха сирин баһылыга Айсен Николаев хамаандата үлэлиир принцибэ көмөлөһөр – дьону истиэххэ, улахан быһаарыылары ылыныыга кинилэр санааларын учуоттуохха. Дамба тутуута Верхоянскай биир сытыы кыһалҕатын быһаарыахтаах, олохтоохтор сыл аайы кэриэтэ халаан уутуттан эмсэҕэлииллэр. Манна хайаларга сүүрээннэр олус түргэнник үөскүүллэр, биэрэги харыстыыр тутуу олус наада. Бырайыак уу ситимин, биэрэги бөҕөргөтүүнү киллэрэр, федеральнай бюджеттан үбүлэниэҕэ. Үлэ 2028 сылга түмүктэниэхтээх. Дамба тутуллан бүппүтүн кэннэ куорат олохтоохторун олоҕун хаачыстыбата биллэрдик тупсарыгар эрэллээхпин», – диэн Ольга Балабкина эттэ.
Өрөспүүбүлүкэ экологияҕа, айылҕаны туттууга уонна ойуур хаһаайыстыбатын миниистирэ Евгений Перфильев Уһук Илин регионнарыгар халаан уутуттан көмүскэнэр дьаһаллар Российскай Федерация бырабыыталыстыбатын приоритетнай испииһэгэр киирэллэрин бэлиэтээтэ. Верхоянскайга дамба тутуутун РФ бырабыыталыстыбатын бэрэссэдээтэлин солбуйааччы — РФ президенин Уһук Илиннээҕи федеральнай уокурукка боломуочуйалаах бэрэстэбиитэлэ Юрий Трутнев өйүүр. Кини 2022 сыллааҕы халаан уутугар Верхоянскайга сылдьыбыта.
«Оччолорго өрүс халааныттан 442 олорор дьиэ уонна 18 социальнай эбийиэк эмсэҕэлээбитэ, уу таһыма кутталлаах бэлиэттэн 71 см үрдээбитэ. Бүгүн биһиги Верхоянскай куоракка 9 км усталаах халаан уутуттан харыстыыр инженернэй тутууну, 700 миэтэрэ уһуннаах ууну, биэрэги бөҕөргөтөр ситими тутууну саҕалаатыбыт. Үлэ уопсай сыаната 1,2 миллиард солк. тэҥнэһэр», — диэн миниистир эбэн эттэ.
Сиһилии манна ааҕыҥ.
This post was published on 20.08.2025 17:53 17:53